عبد الله غلوش يكتب: غلوشيات رمضانية (12)
– فيه مسلسل زاد في يوم وليلة 25 مليون مشاهدة ع اليوتيوب.
– عزيزي الفنان، صدقني شراء مشاهدات وهمية على اليوتيوب أول مراحل الفشل.
– الصياعة بتقول لما اشتري رقم زي ده مشاهدات، انزل بيها 5 ، 5 عشان ماتشمش.
– الصياعة كمان بتقول، لما اشتري رقم زي ده مشاهدات، موصيش حبايبي الصحفيين ينزلوا احصائيات وارقام نسب المشاهدة تاني يوم كده على طول، ومبقاش بجح واشيرها كمان.
– نصيحة اخيرة ، أضحك على الناس براحتك بس بلاش تضحك على نفسك، عالج اخطائك وعيوبك وادرس سبب التراجع في السينما والتليفزيون، بدل ما في يوم هتلاقي نفسك ملط واليوتيوب هايقولك بطلت.
– مي الغيطي اتجوزت “طايع” ونجلاء بدر اتطلقت “لدينا أقوال أخرى”.
– أحمد صلاح حسني قتل أحمد حلاوة “كلبش” ، وحنان مطاوع قتلت روجينا “ضد مجهول”.
– القبض على أيمن عزب “عوالم خفية” ، والإفراج عن هنا الزاهد “أيوب” والإفراج عن ريهام عبدالغفور “الرحلة”.
– فوق السحاب .. يوسي بتاع المافيا ماسك خد ستيفاني صليبا وقاعد يضغط عليه على اساس انه بيخنقها وكده.
– فوق السحاب .. عادة مش بتكلم عن حد يومين ورا بعض، بس اللي يعرف ابن نهال عنبر في المسلسل ياريت يقوله هي مرارة الناس لعبة في ايدك يابو الكباتن ولا ايه؟
– إعلانات الحكومة والوزارات المختلفة في شهر رمضان الحالي .. لم ينجح احد.
– بالحجم العائلي .. السجاير العادية أحسن بكتير من السجاير الإلكترونية .. الدرس المستفاد من حلقة اليوم.
– بإستثناء البيجامه الحمرا اللي كان لابسها امبارح، توني ماهر عامل فرق وإضافة في مسلسلي “رحيم” و “فوق السحاب”.
– رسايل .. محمود جمعة “مهدي” قال لمي عزالدين في الجواب اللي بعتهولها، انه ضرب الراجل طلقتين في كتفه، لما اترجمت لصورة لقينا الطلقتين واحدة في ضهره والتانية في قلبه.
– رسايل .. مهدي قال لمي في الجواب برضه “متسألنيش انا فتحت عربيتك ازاي لاني اصلا مش عارف فتحتها ازاي؟” .. كان ناقص يقولها المؤلف والمخرج عايزين كده.
– مش شرط المسلسل أو البرنامج الحلو بس هو اللي يتعرض على أكتر من محطة، ولكن غالبا عشان رخيص.
– ممنوع ممنوع الاقتراب أو التصوير .. لازمة زينة السنة اللي فاتت “أنت مش عارف إنك أغلى حاجة في حياتي ولا إيه؟” ، ألذ وألطف وأحلى بكتير من لازمة السنة دي ” فنانيك بيروحوا يا مصر”.
– أمر واقع .. صوت ياسمين علي ع التتر .. خسارة في المسلسل.
– اختفاء .. بسمة ممثلة تحب تتفرج عليها.
– يبقى قرآن المغرب بصوت الشيخ محمد رفعت الأجمل في شهر رمضان.
– كلبش .. اللهم ارزقنا في احلك المواقف والظروف، نصف هدوء ولامبالاة محمود البزاوي .
– غياب فتحي عبدالوهاب عن أي حلقة من “أبو عمر المصري”، المسلسل بيفقد نصف قوته.
– غياب فتحي عبدالوهاب عن أي حلقة من “عوالم خفية أو ممنوع الإقتراب أو التصوير” مابتحسش بأي تأثير.
– نسر الصعيد .. مشهد تصفية الإرهابي رضوان “شريف إدريس” واحد من أفضل مشاهد المسلسل حتى الآن.
– نسر الصعيد .. أي مشهد بتظهر فيه هاجر أحمد في المسلسل بأشعر بنوع من القرف والغثيان، وده نجاح في حد ذاته.
– نسر الصعيد .. المأمور بيقول لمحمد رمضان .. “برافو عليك يا زين كان عندك بُعد نظر لما طلبت اننا نحط كاميرات مراقبة حوالين (القسم) ” .. يا جماعة هو إحنا عبط للدرجة دي.
– على مسئوليتي .. الأستاذ أحمد موسى امبارح طلب من محامي يرفع قضية على راموس ويطلب تعويض مليار ونص يورو بسبب اصابة صلاح .. لا واضح إن إحنا عبط فعلا.
– أبو عمر المصري .. حلقة بطلها الأول الموسيقار ساري هاني.
– أبو عمر المصري .. أحمد عز غلط مع أروى جوده ، هي سابت البيت وهو ساب نادية كونده.
– أبو عمر المصري .. لليوم التالت على التوالي ، أروى جودة “هذا المساء” تعود من جديد.
– أيوب .. المسلسل كان ايقاعه حلو، لغاية ما ظهر زكي فطين عبدالوهاب.
– أيوب .. لما كل الستات اللي في المسلسل مقطعة نفسها على محمد لطفي كده، اومال لو كان ظافر عابدين، كان ايه اللي حصل؟
– عوالم خفية .. نفهم من حلقة التسريبات امبارح ، ان عادل إمام بيجسد شخصية عبدالرحيم علي؟
– هارون الرشيد.. اعصر على نفسك لمونة واتفرج على حلقة من المسلسل وصدقني عمرك ما هاتكررها تاني.
– بعد تحويل اوراقه لفضيلة المفتي امبارح “سلسال الدم” ، ضياء عبد الخالق أصبح الممثل الوحيد في رمضان الحالي اللي اتحكم عليه بالإعدام في مسلسلين مختلفين.
– طايع .. عمرو سلامة هايفضل كل يوم يطول في المدة الزمنية لكليب في الحلقات السابقة، لغاية ما الحلقة الاخيرة مش هيبقى فيها ولا مشهد جديد.
– هبه عبد الغني مش محجبة في الحقيقة وطالعة محجبة في ٣ مسلسلات ، وهالة فاخر محجبة في الحقيقة وعاملة مسلسلين وإعلان من غير حجاب .. لا تخرج قبل ان تقول سبحان الله.
– الكِبر لما بيتملك من الانسان بيخليه يتخيل نفسه استغفر الله العظيم إله، ممكن يموت ناس ويحيي ناس لغاية ما هو نفسه يواجه الموت ساعتها بيرجع لعقله.. مي عز الدين “رسايل”.
– مينفعش نغمي عينينا ونقول مستحيل وخلاص .. أمير كرارة “كلبش 2”.
– في حاجات بتبان انها خساير ، لكن لما تقعد مع نفسك وتحسبها، بتعرف ان خسارتها مكسب.. أسماء أبو اليزيد “ليالي أوجيني”.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.