مارينا المصري تكتب: دراما كوين (11)

كل سنة وانتم طيبين، رمضان كريم، وفي “دراما كوين” هجيبلكم كل يوم أبرز المقولات اللي سمعت في ودني، من كل مسلسل، واللي شايفة إن بعضها هيعيش معانا سنين قدام، وتعليقي عليها، وحقيقي تسلم إيد السيناريست.

نرشح لك: مارينا المصري تكتب: دراما كوين (10)

1- أبو عمر المصري

– “كل شيء بخير مش ناقص غير لقا الحبايب، الحس والونس.. بس اللقا قريب”.

(كدة كل شيء ماشي.. أصل يجي منين خير غير من أصحاب الخير الحبايب)

– “الكبار لما حد بيموتلهم بيفتكروا إن دورهم جي، مش بس بيعيطوا على اللي ماتوا، دول بيعيطوا على نفسهم كمان”.

(مبقاش الكبار بس اللي بيحسوا كدة والصغيرين كمان.. ده الكبير بقى هو اللي يدفن الصغير)

– “مفيش حاجة بتحصل إلا لما يكون صاحبها عايزها تحصل”.

(وبالنسبة للأعداء بقى؟!!)

نرشح لك: دليل شخصيات مسلسل “أبو عمر المصري” لـ أحمد عز

2- أيوب

– “ربنا شاهد ومطلع وهو اللي حاسس بينا”.

(الإيمان هو سر الاستمرار والمحاولة في الحياة دي)

– “مراتك دي لو اشتريناها أعضاء مش هتجيب الفلوس دي كلها”.

(أكم من الأزواج المصريين مسترخصين مراتتهم وميعرفوش إنهم هما اللي رخاص)

نرشح لك: بعد وفاة “مايكل”.. 11 تصريحًا لمحمد علي رزق أبرزهم عن “أيوب” و”أبو عمر المصري”

3- كلبش (2)

– “كلنا مقدرين الموقف اللي أنت فيه بس مش معنى كدة تمشي تلطش في خلق الله”.

(كم التناقض في الجملة دي يؤدي إلى التلطيش في خلق الله اللي بتقول الجملة دي، لو مقدر هتعرف إن التلطيش وجع وفِي ناس مبترجعش لطبيعتها بعد ما تتألم، بس مش معنى كدة إنهم بيتحولوا لأشرار بس الوجع بيقوي وبينشف ساعات.. والتلطيش ساعات بيبقى العلاج)

نرشح لك: لماذا لن يموت سليم الأنصاري في نهاية “كلبش ٢”؟

– “أنا أصلي زي العربية، ميتحطلهاش بنزين، تعطل وتزرجن وتقف”.

(وكل واحد وبنزينه بقى أو سولاره، أصل في ناس تكاتك)

– “أنا ليا شروط.. اسمها طلبات”.

(والله المصطلحات دي لو ركزنا فيها هنوفر مشاكل كتير حتى لو عارفين إنها مصطلحات تجميلية ومعناها حاجة تانية).

4- بالحجم العائلي

– “كل الناس بتغلط ويتعلموا من غلطهم”

(في غلط وفي كسر، الغلط بيتصلح أما الكسر مبيتصلحش. اتصدمت لما لقيت الطبقة الأرستقراطية كمان بتاعني من ضرب الأزواج لزوجاتهم مش بس الطبقة الشعبية، تأكدت إن المشكلة في الراجل المصري بشكل عام وعدم القدرة على السيطرة والتحكم في النفس وفي اليد -بكل استخداماتها- في ظل الظروف المجتمعة الموجودة دلوقتي)

نرشح لك: مواعيد عرض “بالحجم العائلي” #مسلسلات_رمضان_2018

5- ليالي أوجيني

-“كلنا عندنا حاجات جوانا بنختار منوريهاش للناس”

(ساعات بتكون طيبة بنخاف نتاكل لو بانت وساعات بتكون شر بنخاف لنتكره ونتفقس، وساعات بتكون خوف مبيطلعش غير للي هيطمنا واحنا عارفين إنه هو أمنا)

– “المهر والشبكة مش بس من قيمة العروسة لكن كمان من قيمة العريس”.

(والله القيمة مش بالفلوس وكترتها)

نرشح لك: سيناريست “ليالي أوجيني”: لا تشاهدوا المسلسل على هذه القناة

– “مفيش حاجة تتقال في حاجة تتعمل”.

(والله ساعات القول بيكون فعل لو من القلب)

– “لو على كسرة النفس هتنحسي ووقتها كل اللي نفسك فيه هيحصل، بس ساعتها ياريت متكونيش نحستي أوي علشان يوم ما يتم المراد تعرفي تنبسطي بيه”.

(يعني كدة مفيش حاجة بتحصل إلا لما صاحبها يعوزها ويسعى ويعافر لها، ولا لما يسبها وينساها بتجيله؟!.. ارسوا يا جماعة والنبي).