عبد الله غلوش يكتب: غلوشيات رمضانية (4)
– امتى هانستوعب فكرة أننا 100 مليون بني آدم ، وأن المسلسل أو الاعلان أو البرنامج اللي مش عاجب حضرتك ممكن يعجب 10 مليون واحد غيرك أو العكس.
– اذكر اسم مسلسل واحد مفيهوش اخ واطي أو اخت واطية؟
– تتجلى روعة ليالي أوجيني في انه المسلسل الوحيد تقريبا الخالي من الموبايل ولايف الفيسبوك وأغاني المهرجانات.
– إنجي المقدم “ليالي أوجيني” مبهجة.
– نادين “ليالي أوجيني” .. فن إختيار توقيت وطريقة العودة.
– الرحلة .. كل مشهد بيجمع بين ريهام عبدالغفور وباسل خياط ، أجمل من اللي قبله.
– فوق السحاب .. مش بالمناظر الطبيعية والتصوير في أوروبا فقط ، تنجح المسلسلات.
– فوق السحاب .. أمير شاهين مشروع سامو زين جديد في البلطجة.
– فوق السحاب .. ياريت حد يقول لإبراهيم نصر ان التمثيل بالطريقة دي خلص من شوية حلوين.
– فوق السحاب .. الحمدلله ان رابطة أولتراس أهلاوي اتحلت ، قبل ما المسلسل يتعرض.
– فوق السحاب .. ياريت حد يقول للأستاذ السيناريست ان دورة الميكروباص في لغة السواقين ، اسمها فرده مش دور.
– فوق السحاب .. ياريت كمان حد يقوله ان مرتضى منصور رئيس الزمالك مش الأهلي.
– لدينا أقوال أخرى .. هدى المفتى افتكروا الاسم ده كويس.
– رشا وحماتها .. قنبلة ضحك.
– ممنوع الإقتراب أو التصوير .. نسرين أمين مشروع ممثلة كبيرة ضيعها سوء إختيار أدوارها.
– أبو عمر المصري .. محمد سلام جميل انك تجرب نفسك في الأدوار الجد بعيد عن الكوميديا ، لكن الأجمل انك متجربهاش مرة تانية.
– أبو عمر المصري .. أروى جودة بدون تامر محسن ممثله عادية جدا.
– اختفاء .. الظهور الأول لمحمد ممدوح.
– اختفاء .. حتي الان مش لاقي اي سبب منطقي أو حتى غير منطقي كان يستدعي ان نيللي كريم تطلع في دور استاذة جامعة في روسيا.
– مليكة .. المسلسل لو كان بطولة أي حد غير دينا الشربيني ، ان شاء الله حتى ميار الغيطي ، كان سهل جدا يكون واحد من أكتر المسلسلات مشاهدة في رمضان الحالي.
– نسر الصعيد .. الطريقة اللي فلت بيها محمد رمضان من الحشيش في طابور اكاديمية الشرطة، لا تصلح سوى لحلقات توم اند جيري ، والحوار اللي دار بينه وبين مشرف العنبر بتاعهم ينفع في مسلسل بكار.
– نسر الصعيد .. مؤمن نور ممثل عادي جدا ومعملش اضافة في اي مسلسل عمله.
– نسر الصعيد .. بظهورها الأول في حلقة النهارده، أضفت درة حالة من الرتابة و الفتور على اجواء المسلسل.
– نسر الصعيد .. نور قرعته نورت المكان كله .. المفروض ان ده افيه محمد رمضان قايله ، والمفروض اننا نضحك وكده.
– وقعة الشاطر بألف .. أحمد السقا لياسمين صبري ” رمضان ٢٠١٧”.
– وقعة الشاطر بألف .. أحمد السقا لياسر جلال : “رمضان ٢٠١٨”.
– باستثناء المشهد اللي كانت بتضرب فيه ابنها في مسلسل “ضد مجهول” ، روجينا تعيش واحدة من ازهى فتراتها.
– كلبش .. هو مفيش حد قال لعبد الرحمن أبوزهرة انه بيمثل في كلبش مش بيعمل دوبلاج في كارتون كليلة ودمنه؟
– كلبش .. تقريبا نص ميزانية المسلسل رايحة على الكراسي اللي بيكسرها أمير كرارة كل يوم.
– رحيم .. ياسمين غيث وبس.
– رحيم .. احيانا الأفورة في الأكشن بتجيب نتايج عكسية .. نطة رحيم ابسط دليل.
– سيد رجب اتجوز دينا “نسر الصعيد” ونيللي كريم اتجوزت محمد علاء “اختفاء”.
– محمد رمضان خبطته عربية ” نسر الصعيد” وهشام سليم خبطته عربيه نقل ” اختفاء” .
– منذر رياحنه طلع لسه عايش “أبو عمر المصري” وخالد كمال طلع لسه عايش “ليالي أوجيني”.
– بالحجم العائلي .. بعيدا عن توظيف المشهد في سياق الدراما ، لكن انا ذنبي ايه اتفرج على مشهد 8 دقايق لندى موسى وهي بتعمل مساج لرجل يحيى الفخراني.
– الجواز مرمطة اكتر من الشغل ، ع الاقل الشغل بتاخدي علي المرمطة بتاعته فلوس اخر الشهر.. انتصار ” ليالي أوجيني”.
– الشئ الوحيد اللي أصعب من الجهل ، هو الوصول لنصف الحقيقة.. مي عز الدين”رسايل”.
– ربنا يكفيك شر الست لما تحط في دماغها واحدة ست .. جوليا شواشي “الرحلة”.
– الدنيا متفاته ، والسيرة أطول من العمر .. محمد رمضان “نسر الصعيد”.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.