مينا عادل جيد يكتب: مدفع الإضحاك (1)

(رحيم، طايع ،أيوب، مليكة، قانون عمر، لعنة كارما) هما أبطال المسلسلات مالهمش أب ولا إيه السنادي؟! ما علينا وبعد ما شفت أول حلقة من مسلسل طايع، كانت معظم الأحداث في السجن، وأول حلقة من مسلسل رحيم كان لسه طالع من السجن برضه، وأيوب شكله كده على نص رمضان داخل السجن، قولت هو قطاع السجون بدأ ينتج مكان قطاع الإنتاج ولا إيه؟

يمكن حقيقي أنا معنديش إفيهات على دقن ياسر جلال في مسلسل رحيم زي كل المصريين، ولكن جاءني تأمل في أول مشهد من مسلسل رحيم، اللي فيه ياسر جلال بينزل من الطيارة بيقابل محمد رياض قولت في عقل بالي (على موسيقى لن أعيش في جلباب أبي لحسن أبو السعود): “الله يرحمك يا معلم عبد الغفور يا برعي لو كنت عايش كان زمانك بعت الطيارة دي خردة وجبت بتنمها شقة وكتبتها باسم سنية بنتك الكبيرة”.

نرشح لك :  مواعيد عرض رحيم #مسلسلات_رمضان_2018

وبيقولوا أن أحد الكتاب الدراميين سأل منتجه قبل رمضان: “كيف يا إكس لانس تريد مني أن أكتب مسلسل صعيدي وأنا لم أذهب للصعيد أبدًا ولا أعرف شيئًا عن الناس هناك؟!”، فرد المنتج عليه وقال: “يا إكس لارج سهلة أكتب اتوحشتك جوي يا بوي في نص كل حلقة وهتعدي”، فضحك الكاتب ثم ضحكوا الصعايدة على أسرة المسلسل في رمضان مثل كل عام.

ذهب صناع مسلسل نسر الصعيد في رحلة شاقة للبحث عن سوكسيه يجيب صريخ تصفيق في صالات المنازل ولكن للأسف مفيش سوكسيه لقط، كلها جمل محدش حاسس إنها مؤثرة وقوية وهتعلق مع الناس في الشوارع غير محمد رمضان وبعض ملامح من وجه وفاء عامر وفني إضاءه من الكرو رفض ذكر اسمه.

نرشح لك : مواعيد عرض “نسر الصعيد” #مسلسلات_رمضان_2018

جاءت الحلقة الأولى لمسلسل ربع رومي غير مبشرة بالنسبة لي، وكنت ناوي ماشفش المسلسل تاني لولا غلاوة مصطفى خاطر عندي ككوميديان مجرم لسه ماشفناش ربع موهبته حتى الآن، فشاهدت الحلقة الثانية فصالحوني وضحكوني شوية كتار، ولكن لسه مش شايف محمد سلام في أي مشهد بيمثل فيه، لعل المانع خير!

نرشح لك : مواعيد عرض ربع رومي #مسلسلات_رمضان_2018

وربع رومي خلاني افتكرت إن آخر مرة هالة فاخر ضحكتني كان في مسلسل (وانت عامل إيه؟ كويس ولا إيه؟)، ثم جاءت ليه فكرة أخرى على طريق سؤال وهو: “مش عارف ليه المنتجين مش راضين يحصروا هالة فاخر في أدوار أم حمادة هلال على طول علشان نخلص من الليلة دي بقى؟”