وائل سعد يكتب: لماذا "رمضان" الشهر المفضل لـ بطوط؟

بعد أسئلة كتير لـ بطوط عن شهر رمضان.. اكتشفت إحنا قد إيه بنحبه.. هقولك ليه هو فعلا شهر يتحب:

نرشح لك – مواعيد 32 مسلسلًا في #رمضان_2018

1-إنت عارف يعني إيه تاخد أجازة من الدنيا لمدة 30 يوم، شهر متعة، الكسل فيه ملوش آخر، إحنا نايمين حتى وإحنا في شغلنا الصبح، وإحنا في الشوارع، كله تقريبا طول ما الشمس طالعة نايم، أول ما تغرب مع آذان المغرب الكل بيصحى.

2-رمضان ده شهر بتاعنا.. بتاعنا كلنا، كل المصريين في رمضان شبه بعض، وبرده كلهم تقريبا مبيظهروش بأكل الصبح. الموضوع موضوع شعب وأمه عايشة شهر كسل واحد.

3- انت بتحس إنك الطبيعي في شهر رمضان إنك تكون أجازة، لكن إنك تروح الشغل فده جميل يبوس أصحاب الشغل أيديهم وش وظهر على فكرة إننا جينا الشغل.. ده جميلة نشكر عليها.

4- انت في رمضان حقك تاكل كل حاجة، وبدون حساب.. 30 يوم ولائم، ركز كده، أول أسبوع بيبقى وليمة البيت اللي هو بنستهلك 70% من الحاجات الحلوة المميزة في رمضان من الأكل والحلويات، ومن تاني أسبوع تبدأ العزومات الخارجية، يا أنت معزوم يا أنت عازم، تحس إنك بتهرب منها من كترها، فيه أحلى من كده؟!

5- أنت متخيل الشهر ده مكسب كوكب الأرض قد أيه فلوس؟ من شرقها لغربها، أكل وشرب وزيت وسكر ومكسرات وياميش بأنواعه الكتير والفوانيس ده شغلت كام مصنع بلاستك وكام مصنع حديد وكام مصنع قماش في العالم. أنت عارف فيه كام مليون واحد كلوا عيش من ورا المسلسلات اللي بيتخانق أصحابها النجوم طول الوقت وبيراهنوا على مزاج أنتخة حضرتك قدام التلفزيون، ده إحساس لوحده  يجنن، كل نجوم المنطقة دي من الأرض بيتخانقوا على لفت انتباهك.. أنت النجم الشهر ده.

6- لو أنت مسلف حد فلوس، بتتكسف تطلبها منه في رمضان غالبًا، بتحسها عيبة، فتخيل كل المديونين اللي هما كل الناس بشكل أو بآخر بيناموا وهما مكبرين دماغهم، احتمال كبير مش هتطالب بيهم غير بعد العيد.

7- رمضان ده السنادي مختلف عن كل الرمضانات التانية، أواخر رمضان وفي العيد في كاس العالم .. شهرين ورا بعد البلد دي مقفولة، مفهاش غير الكافيهات اللي شغالة ومطاعم الأكل.

8-أنت عارف كمية الخشوع اللي بتطلع من الناس في الشهر ده، كفاية كده قبل المغربية وكله ماسك المصحف بيقرأ، والا الفجرية، تحس السما طالع منها كمية خشوع غير طبيعية، هو طبعًا قل كتير عن زمان، بس لسه موجود.

9- تحس إن كل بيوت مصر مفتحة على بعض في رمضان، كله عارف كله بيعمل أيه.

تحياتي

#صاحب_التفاصيل