مينا فريد وإيفيت سليمان : مين يمسك الريموت؟؟
هي: تعالى نشوف برنامج ريهام سعيد.
هو :مش ندمانه على الطلب ده ؟هاتي الريموت..أنا راجل البيت و التليفزيون ده أنا اللي شاريه و مش هنشغل فيه ريهام سعيد..
هي : مفيش ريموت…أنا ست البيت و البيت كله بتاعي… و هشوف ريهام سعيد .. بدل ما أجيبهالك هنا…
هو: لا لا خلاص .. و على إيه .. طب بصي بعد عشر شهور جواز بقى فيه صراع متكرر على الريموت بينّا.. و عشان نفض الإشتباكات هنكتب سوا و نحكي للناس كل حد إيه بيحبه و إيه بيكرهه .. و هم يقولوا مين يستاهل الريموت .. كل واحد في أوضه و إطفي التليفزيون يلا…
الرياضة
هي :
مبدئيا مابحبش الماتشات … و هو بيحبها .. المشكلة إن بديل إني أشوف الماتش معاه إنه ينزل ع القهوة .. و طبعا هو ما هيصدق .. فبشوفها معاه – أنا لازم أسيطر برضه- اللي بيغيظني إنه بيفضل يشوف تحليل قبل الماتش و تحليل نص الماتش و تحليل بعد الماتش .. أنا مش عارفه أفهم هم بيتكلموا في إيه بس أهو رغي .. كل ده بعدّيه في سبيل إنه ماينزلش .. ماعدا حاجة واحدة…. إني زمالكاوية و هو أهلاوي .. و هو مقتنع إني وشي وحش على الأهلي ده على أساس يعني إن صبي القهوة وشه أحسن مني !!.. حازم إمام و أحمد حسن و محمد بركات بطلّوا يلعبوا .. إزاي لسّه بيشوفوا ماتشات أصلا..
هو :
تقريبا مش بشوف في التليفزيون إلا الماتشات .. بدوّر على القناة اللي فيها كابتن محمود بكر و مش بطلع في البلكونه خالص و هو بيتكلم زي ما بينصحنا دايما..و عشانأنا زوج مثالي و مابحبش أضايقها … القهوة حل كويس جدا – و أهو الواحد يفك شوية – بس هي بتصمم تشوف الماتش معايا … بتحب الكورة أوي مثلا !!.. بس أنا إتخذت تكنيك جديد .. بستغنى عن القهوه و أشوفه معاها في كافيه .. ف طبعا بلاقي رد الفعل .. كالتالي …
إنت خارج معايا ولا مع الماتش .. ؟
مع الماتش يا حبيبتي.
ده ضربه جامد يا مينا مش المفروض بلنتي ؟
لأ ماهو الحكم زعقله.
يعني إيه أوفسايد دي ؟
كإنك عاوزاني أعلّمك ياباني بالظبط.
اللعيب ده مش نضيف .. بيتف في الأرض..
عشان نسي باكو المناديل مع المدرّب معلش..
إنت بتتريق عليا على فكره كنت بلّعب كوره على السلّم و فاهمه القوانين ماتعاملنيش إني جاهلة .. شاركني أنا مراتك..
كوره ع السلّم ؟يا نهار إسود .. غيّر ولعة يابني هنا..
الطبخ
هي :
علاء الشربيني بقى على قناة النهار ده أحسن واحد بيعمل أكل من المكونات اللي موجوده في أي سوبر ماركت عادي عشان كده هو المفضل عندي .. القنوات التانية بتعمل أكل عجيب بحاجات أصلا مش عارفه إسمها .. أنا بحب الطبخ و مش بتفرّج بس لا كمان بيرجع بيلاقي إختراعات دايما بجرّبها فيه بعد كده بحكيها لأصحابي في الشغل..و عشان كده هو مبسوط.
هو:
من اللحظات الهادية في البيت لما بييجي برنامج علاء الشربيني على النهار .. صراحة هو عنده كاريزما مختلفه عن أيوه يا هاتم و ياجمالو يا جمالو و شريف مدكور و الفرق بين اللحمة البتلو و اللحمة الضاني … طالما بتنفذ اللي بتتعلمه بشجعها جدا .. و باخد كتاب و أدخل أقرا في الأوضة .. زي ما قلتلكم أنا زوج مثالي و مضحي..
الأفلام
هي :
بحب الأفلام الهندية و بحب شكري سرحان .. هو مش بيحب شكري سرحان ولا عماد حمدي و أنا بحبهم .. بس عرفت أخليه يشوف كام فيلم هندي معايا على إم بي سي بوليود و حبهم بس مش بيقول عشان مايبانش إني علّمته حاجه .. المشكلة إني مش عارفه أخليه يحب شكري سرحان ولا عماد حمدي…
هو..
طول حياتي كنت أسمع إن البنات و الستات بيحبوا رشدي أباظه .. أحمد رمزي ..عمر الشريف .. لكن شكري سرحان و عماد حمدي دي جديدة … و أنا اللي كنت فاكر إنها إتجوزتني عشان شبه عمر الشريف و كده .. عموما هي حببتني في الأفلام الهندي الجديدة .. كانت فكرتي عنها إنها أفوره و بس.. بس فيه كام فيلم حبيتهم معاها..
إحنا …
مش لازم عشان متجوزين نحب نشوف نفس البرامج و الأفلام و المسلسلات .. أه إحنا مختلفين في ذوقنا بس بنحب نشوف حاجات كتير سوا بس شوية تنازلات بس عشان نكون سوا .. مفيش أحلى من لمّتنا في بيتنا قدّام التليفزيون اللي كنا بنحلم بيها و إحنا مخطوبين .. بنحب نشوف صاحبة السعادة سوا .. و مستنين نشوف “ذا فويس” في بيتنا زي ماكنا بنشوفه سوا أيام الخطوبة.. مستنين ماتش حلو لمصر في بطولة مهمه نشوفها سوا.. مستنيّين مسلسل حلو زي مسلسلات عادل إمام نشوفها سوا … و الحمدلله مش بنحب المسلسلات التركي..
عموما إحنا لازم نخلص كلام معاكم بسرعة عشان فيه فيلم لشكري سرحان جديد ماشفناهوش غير 6 مرّات بس..
هو: واضح إن الصراع مش بس ع الريموت ده على القلم اللي بكتب بيه كمان .. الجملة اللي فوق دي أنا ماكتبتهاش.
هي : لأ كتبتها .. و هنشوفه … هات الريموت..
هو : مفيش ريموت… أنا راجل البيت و التليفزيون ده أنا اللي شاريه..
هي: أنا ست البيت و البيت كله بتاعي..
مفيش فايدة ..و بيفضل السؤال مين يمسك الريموت .. ؟
اقرأ أيضًا:
أول تعليق لباسم يوسف بعد جراحة ركبته
وزير الثقافة: لازم نصرف 220 مليون في 3 شهور
إسلام بحيري: الأزهر ساب داعش وبيهاجمني
حتى لا يخسر إسلام بحيري المعركة!!
Mbc عن الـ”Boss”: من كواليس الإعلام إلي “لا يليق بالمحتوى”