محمد رضا يكتب : يونس ولد بحري

دائما بكون موجود بحكم شغلى في العاصمة ولو سمحت لى الفرصة في اجازة او مناسبة بكون موجود في احدي محافظات الصعيد وهي المنيا عروس الصعيد بين الأهل والاصحاب وسطهم بتحس دايما بطعم الاجازة وطعم رمضان اللى صادف وجودى بينهم أول رمضان وكان عندي بعض المشاوير ووقتها ما كنتش قررت لسة هتابع ايه من المسلسلات خالص غير بس كام برومو شدوني فقلت يا مسهل.

بدأت التحرك وطبعا وانت ماشي بتقابل ناس بتحبهم ولك علاقة جامدة بيهم وناس تعرفهم بس معرفة سطحية فبتكتفي بضحكة او ابتسامة خفيفة معاها ازيك اخبارك ايه وبتعدي على كام محل تهزر مع كام واحد فيهم واثناء الهزار كان بيبتدي مسلسل يونس ولد فضة فدار الحوار الاتى ايه ده يا معلم مسلسل ايه ده رد: ده مسلسل يونس ولد فضة بس شكله مسلسل جامد فقلتله انت لسة اتفرجت على حاجة فرد بيبان على فكرة مشيت وانا بقول في نفسي يمكن اغنية (بحبك يا صحبي) عملتله دعاية كويسة دخلت محل تانى بس الكلام خدنا وكان المسلسل بدأ فقررت آجل المشوار اللى انا رايحه ليوم تانى لان بصراحة القعدة كانت حلوة والكلام كان أحلى أجلت المشوار واتفرجت على أول حلقة اللى عجبتني وشدتني فقلت آدي اول مسلسل.

تانى يوم قلت انزل بقي اروح مشوارى وقفت تاكسي وبالصدفة غير المقصودة بالمرة كان وقت عرض مسلسل يونس ولد فضة ولانى طبعا ما كنتش لحقت اركز في مواعيد عرضه ولكن الطريق اللى مشي منه التاكسي كان شارع من اشهر الشوارع اللى مليان محلات مابين ملابس وقماش وقطع غيار يعنى باختصار من الابره للصاروخ وباختلاف الثقافات والاحتياجات وطبعا المحلات دي في منطقة سكنية وعادة الشارع ده على طول زحمة فممكن التاكسي يعديه في ربع ساعة او اكتر شوية ودول تتفرج فيهم على فاصل او اتنين باعلاناتهم بالتفت لاقيت المسلسل شغال فقلت ده كده بقي قدر بس اكيد مش صدفة كمان ان في حد بيتابع المسلسل اهو للمرة التانية فبدات اركز في كل التلفزيونات اللى موجودة في المحلات لدرجة كل ما التاكسي يهدي اطلع وشي من الشباك وابص جوة المحل اشوفهم مشغلين ايه حسيت ان السواق فهمني غلط فقلتله معلش اصل انا عايز اعرف حاجة كده بصلي باستحقار وقلى ايه هي طبعا فهمت من بصته انه افتكرني ببص على الستات اللى في الشارع فقلتله عايز اعرف الناس بتابع ايه انت بقي متابع ايه يا اسطي قلى بتجهم انا ما بتفرج على تليفزيون في رمضان قلت شكرا لو فضلت افهمه من هنا للصبح هايقول عليا تافه ومش بعيد يقلى انزل ياض يا سيس من التاكسي كملت وانا ساكت بس مصمم اتابع الناس بتتفرج على ايه طبعا ما كانش السوق متجمع حوالين حاجة واحدة ولكن الحق يقال كان كتير مسلسل يونس ولد فضة مشينا شوية وكسر التاكسي من شارع جانبي علشان يهرب من زحمة الشارع ولسة مركز واثناء التركيز عيني وقعت على اتنين قاعدين بيلعبوا دور شطرنج ومطلعين التلفزيون في الشارع لاقيت نفسي بقول ياااااااااااااااه كويس جدا ان العادة دي لسة موجوده لانى من الناس اللى كنت بفرح قوي لما كان والدي وعمي رحمه الله يعملوا الموضوع ده ويتجمع كل الجيران واحنا بنتفرج كل اللى عنده حاجة يطلعها علشان اللمة تحلى والتسلية تزيد ده غير نظافة الشارع اللى كانت بتبقي قبل اللمة دي واللى كانت بتبقي نظافة غير عادية وكانه فرح بس تصدقوا برضوا الناس دي كانت بتتفرج على يونس ولد فضة يمكن تفتكروني متعاطف مع المسلسل او حد يقول مش قوي كده او اني ببالغ لكن رغم الوقت القصير ده الا ان ده اللى حصل بالفعل ؛ قول بقي صدفة قدر زي ما تقول قول والاغرب من كده انهم كانوا مركزين في اللعب وفي المسلسل بس واحد فيهم كان مركز اكتر من التاني لانى لما سلمت عليهم لان التاكسي كان ماشي على رجله مش على عجل فطبيعي كان لازم اقول السلام عليكم واحد رد بترحاب شديد والتاني بجمب وشه وعينه الاتنين على التليفزيون وكأنه بيقلى عليكم السلام اهدي بقي عايز اسمع بيقول ايه.

قلت كده بقي مش رأي واحد ده شكل المسلسل حلو فعلا من وقتها قررت بدل ما أركز الناس بتتابع ايه وفضلت مركز حتى وقتنا هذا لكن ركزت كمان مع المسلسل وفضلت طول الوقت اللى انا موجود فيه اتفرج على المسلسل وانزل اقعد في المحل ده واناقش الناس فيه إما اختصر الوقت وانزل اتفرج على المسلسل في المحل وسط الناس علشان اسمع تعليقاتهم ويوم ورا يوم وحلقة ورا حلقة الى ان ثبت اعجاب الناس بالمسلسل بالفعل.

علق البعض منهم على ان الفنان عمرو سعد لم يتقن اللهجة الصعيدي وخصوصا انه طالع في المسلسل من سوهاج واتنقل لقنا لما خدته فضة علشان تعمله ابنها والمحافظتين دول في الصعيد بالذات من اكتر المحافظات اللى اللغة فيهم ناشفة يعني صعيدي قح حتى لما حد فيهم بيحاول يتكلم بحراوي بيلاقي صعوبة لان عندهم الجيم جيم صوح للامانة انا كمان لاحظتها لكن كان عندي حب استطلاع او كنت عايز اتأكد اكتر فكان كل مرة يكون شغال فيها المسلسل والاقي ناس غير الناس اطرح نفس السؤال ايه رايكم في اداء عمرو سعد فيردوا لا فنان مع شوية مد في الالف وايه رايكوا في لهجته في ناس بتقول انه بيتكلم صعيدي بحراوى فيردوا الصراحة اه بس العيب مش عليه العيب على المدرب (المصحح اللغوي) وبدا البعض منهم ذكر بعض المشاهد اللى كان بيتكلم فيها الفنان عمرو سعد صعيدي بحراوى فياريت صناع العمل يهتموا بكل تفصيلة في العمل بداية من اللبس للشكل للكلام لان تفصيلة صغيرة من دول ممكن تفصل المشاهد انه يتابع المسلسل كومبارس المفروض يطلع يقول كلمة لو قالها غلط او ما كانش بيمثل بيفصل الناس وبيضايقهم الاهتمام بادق التفاصيل هي قمة النجاح ولا تستهينوا بعقول المشاهدين.

نرشح لك

محمد رضا يكتب: ماكبث والإنترنت

بالصور : فنانون وإعلاميون وكتاب ونقاد في ضيافة إعلام.أورج

10 اختلافات بين جراند أوتيل المصري والأصل الإسباني

شارك واختار .. ما هو “أسوأ” مسلسل في رمضان 2016 ؟ أضغط هنـــا