مينا فريد يكتب: مزازيك رمضانية (1) (كلام في الكنافة 4)

23 يونية 2016 | 10:12 مساءً

كلام في الكنافة النهاردة عن الموسيقى في رمضان هذا الموسم.. مش بس موسيقى و أغاني تترات المسلسلات لأ كمان الموسيقى التصويرية و موسيقى الإعلانات و موسيقى الأغاني اللي صدرت في رمضان السنة دي ….

بدون مقدمات طويلة..

بسبب إن الكثافة الإنتاجية السنة دي صعب تتحصر في مقال واحد .. ده الجزء الأول من مزازيك رمضان .. و هتتبعها أجزاء تاني

أولا : المسلسلات : الجزء الأول.

يونس ولد فضة

عمر طاهر كتب تتر حلو أوي … و أحمد سعد عمل لحن حلو أوي و غناه حلو أوي… أحمد سعد من كتر ما سمعت عن فسخ خطوبته و الرجوع في قراره .. كنت متوقع ألاقيي ع التتر:

” الموسيقى التصويرية للفنان أحمد سعد اللي فسخ خطوبته بصورة نهائية”.. توزيع تتر البداية كان لخالد نبيل و حسيته قريب أوي من توزيع أغنية منازل اللي كانت في ألبوم أصالة الأخير…

كمان تراك بحبك يا صاحبي اللي غناه أحمد سعد لنفس المسلسل و نزل قبل رمضان كان رائع.. رغم إنه زق شوية أحمد سعد لمنطقة الشعبي .. الأغنية محققة رد فعل كبير في المناطق الشعبية لحد دلوقتي.. بحبك يا صاحبي كتبها عصام حجاج و لحنها تامر حجاج و وزعها أشرف البرنس.

هي و دافنشي

نسيب “يونس ولد فضة” و نروح ل “هي و دافنشي” .. راجح داوود رجع ببصمة موسيقية من أحلى البصمات الموسيقية ليه.. صاحب أسطورة البسكاليا و مزيكا مسلسلات ” هوانم جاردن سيتي” و “رجل من زمن العولمة” و أفلام ” رسايل البحر” و “أرض الخوف” و “البرئ”.. بيرجع بقطعة فنية رائعة كتبها محمد الحناوي و إتغنت بصوت ريهام عبد الحكيم…

الموسيقى التصويرية نفسها كمقطوعة رائعة .. وهي نفسها موسيقى تتر النهاية..

القيصر

أما صناع مسلسل القيصر.. حافظوا على عادة يوسف الشريف إنه يستخدم الموسيقى بس.. الحقيقة السنة دي إختيار موسيقى عمرو إسماعيل كان موفق للجو العام للمسلسل.. عمرو إسماعيل أشهر مقطوعاته كانت في أفلام “أبو علي” و “خارج على القانون” و “ظرف طارق”..

https://soundcloud.com/mohamed-mosaad-17/mp3

الكيف

بعد ما تألق الفنان بهاء سلطان في تتر مسلسل”مزاج الخير ” أسندوا ليه غناء تتر مسلسل ” الكيف “… و ده شئ يحتاج لدراسة .. إشمعنى يعني بهاء سلطان اللي يغني تترات مسلسلات المزاج ؟

عموما هو التتر الأسوأ.. أسوأ كلمات تتر حصلت في تاريخ الدراما المصرية من سنين للكاتب مصطفى حسن.. أغنية “كله فجر” في البداية .. مع أغنية ” الكيف” اللي إختاروها كأغنية تسويقية للعمل..و كأنهم لم يكتفوا بأن يكون باسم سمرة مكان محمود عبد العزيز و كأنها تحتاج لأسباب فشل أكثر..

تخيل ان القرار في هذه الأغنية.. ” جاتنا نيلة .. الغاية تبرر الوسيلة.. جاتنا نيلااااا.. دي حجة الناس العويلة.. جاتها نيلة”

تتر في البليلة

ثم يستكمل.. ” فوقوا .. فوقوا..فوقوا.. فوقوا”

ثانية واحدة … الكلام ده لينا إحنا يا أستاذ بهاء ؟

https://www.youtube.com/watch?v=DgEA_Z0AyGs
ثانيا : الإعلانات : الجزء الأول

م المدفع للمدفع

أورانج – موبينيل سابقا – سياستها الإعلانية في رمضان كل سنة إهتمام بالمحتوى الموسيقي أكتر من النجوم و ده ظهر في حملة رمضان السنة اللي فاتت و غنوة” إنت فاعل خير “و قبلها علشان “لازم نكون مع بعض”.

السنة دي وازنت بين المزيكا و النجوم .. زي ما عملت في إعلان “أفتح بيبان قلبك”.. دويتو أحمد فهمي و أكرم حسني كان رائع تمثيليا.. و اللي عمل المزيكا بالمناسبة أحمد طارق يحيى إبن كابتن طارق يحيى اللي ليه في السابق بصمات موسيقية رائعة في قناة القاهرة و الناس.. موسيقى سهلة و توزيع رائع و الناس بقت بتغني من المدفع للمدفع من غير سبب كده.