عمرو أديب بعد ثلاثية الأهلي أمام الزمالك: "63 سنة بشجع فريق مابيكسبش"
علق الإعلامي عمرو أديب على خسارة نادي الزمالك أمام النادي الأهلي بثلاثة أهداف دون رد في الدوري المصري.
قال "أديب" خلال حلقة اليوم من برنامج "الحكاية" عبر قناة "mbc مصر": "الناس بتقولك عمرو أديب هيطلع يندب لنا، أنت عايزني أعمل إيه؟ الأهلي ملعبش النهاردة، مابهنئش الأهلي، لو الأهلي النهاردة كان لعب كورة، كنت هقول.. أنا تعبت، شيء في قلبي يحترق، أنا مركب دعامة يا عالم، الرحمة، يقولك ده هيطلع ينوح بقى، طيب اطلع أعمل إيه؟".
تابع: "أنا بقعد أفكر طيب أنا لو كنت أهلاوي من الأول كان ممكن يكون فيه إيه في الحياة أفضل من كده؟ لو الزمالك مخدش الدوري السنة دي، أنا هزعل أوي، 63 سنة بشجع فرقة مابتكسبش".
أوضح: "إحنا محتاجين دكتور نفساني، نادي الزمالك ده محتاج دكتور نفساني علشان يقعد مع اللاعيبة يكلمهم ويقولهم لاعيبة الأهلي دول بني آدمين، حسين الشحات ده بني آدم".
وفي تعليقه على الفارق الفني بين الفريقين، قال أديب: "ليه الأهلي لما بيهاجم الزمالك يبقى مفتوح والزمالك لما يهاجم يبقى الأهلي مقفول.. كل هجمات الأهلي كأنه راكب طيارات F16، الملعب كله مفتوح.. الأهلي بيطلع بطيارات F16 وF35.. بن شرقي جايب جون كورة شراب".