لوسي: انسحبت من مسرحية "الحفيد" بسبب الألفاظ الخارجة

قالت الفنانة لوسي، إنها انسحبت من مسرحية “الحفيد”، لأنه تم تغيير قصة العرض بعد عام من البروفات، موضحة أن هناك خروج عن النص وألفاظ خارجة وإيماءات لا يمكن قبولها في المسرحية.

أضافت “لوسي” خلال مداخلة هاتفية في برنامج “الحكاية” مع الإعلامي عمرو أديب المذاع عبر شاشة “mbc مصر”: “أنا انسحبت من المسرحية لأن مينفعش أبقى بعمل عرض محترم والأقي خروج عن النص وألفاظ خارجة وإيماءات مقبلهاش أنا لو في الشارع هقف أقول إيه اللي أنت بتعمله؟ ما بالك بقى على خشبة المسرح القومي، اللي وقف عليه أستاذتنا، أنا مقدرش استحمل، وقولت كذا مرة إحنا بنعمل عرض كويس ومحترم وعندنا إقبال، رافضين ويزعلوا لو أنت خدت سوكسيه زيادة عن اللزوم”.

نرشح لك: استمع.. أغنية “إنسان آلي” لـ سميرة سعيد

أشارت: “الناس جاية لتلت أسماء لوسي والمسرح القومي والأديب عبد الحميد جودة السحار، أنا رميت الموضوع ده ورا ضهري لأني تعبت، 44 ليلة عرض أنا كنت بنزف دم من مناخيري وبعمل 3 مراحل، وفي 30 ثانية بتلاقيني واحدة ست كبيرة و30 ثانية بتلاقيني واحدة ست صغيرة، مفيش التزام بالحوار واللي عنده جملة عايز يخليها 25”.

أوضحت: “اللي بتقولك أنا ضربتها بالقلم أنا ضربتك القلم الأول والتاني التالت والرابع والخامس سكتي ليه، وبعدين تستشهد بالكاميرات يقولك مفيش كاميرات إحنا مسحناها، طب أجيب حقي إزاي.. أنا مضربتش حد طبعا، أنا بقالي 30 سنة في الوسط الفني ويشهد عليا النقيب إني معنديش شكوى، هو أنا رايحة اتخانق.. أنا استحملت شباب جدد عشان أدي فرصة وشباب موهوبين وكويسين، واللي طالع يجيب سيرتي ويغلط فيا الأستاذ إيهاب فهمي مدير المسرح سابقا مشاه”.

في نفس السياق، يستعد أبطال مسرحية “الحفيد” لاستئناف العروض للموسم الرابع، على خشبة المسرح القومي قريبا.

ويقوم فريق المسرحية حاليا بعمل بروفات مكثفة، مع الفنانة سماء إبراهيم، التي وقع الاختيار عليها لتكون بطلة الموسم الرابع خلفا للفنانة لوسي.

يذكر أن مسرحية “الحفيد” مأخوذة عن رواية للأديب الكبير عبد الحميد جودة السحار، وسبق تقديمها من خلال فيلم “أم العروسة” سنة 1963، وفيلم “الحفيد” سنة 1974.

تناقش المسرحية العادات والتقاليد الأسرية بشكل كوميدي اجتماعي، حيث تتناول الأسرة المصرية التي تتحكم فيها العادات والتقاليد دون الوعي للتأثير الذي تتركه في الأولاد من أبعاد نفسية مرهقة، من خلال لعبة درامية مختلفة بتتابع درامي غير تقليدي يستخدم كوميديا الموقف.

يشارك في مسرحية الحفيد عدد كبير من أبناء المسرح القومي وعلى رأسهم تامر فرج، عادل عفر، محمد مبروك، شيريهان الشاذلي، يوسف المنصور، رنا خطاب، زينب العبد، محمود عبدالرازق، نشوى علي عبدالرحيم، ندا عفيفي، وعبدالباري سعد وديكور حمدي عطية، وإضاءة حازم أحمد، وملابس مروة عودة، والتعبير الحركي شيرين حجازي، وموسيقى كريم عرفة، وإعداد وإخراج يوسف المنصور.