شاهد.. بكاء أحمد فتحي أثناء حديثه عن والده

شاهد بكاء أحمد فتحي
بكى الفنان أحمد فتحي، على الهواء أثناء حديثه عن والده الراحل، موضحا أنه كان قريبا منه جدا، فهو الوحيد الذي كان يفهمه ويتقبل النصح منه.

أضاف “فتحي” خلال لقائه في برنامج “واحد من الناس” مع الإعلامي عمرو الليثي المذاع عبر شاشة “الحياة”: “والدي كان في علاقة كبيرة بيني وبينه، وكنت بحبه أوي وهو كان بيحبني أوي، هو الوحيد اللي كان فاهمني ودايما كان بيسايسني، ولما جيت أتجوز قال لمراتي أحمد له طريقة في التعامل هو دايما كان بينصحني ويريحني وبياخد باله مني”.

أشار: “أنا شخصيتي غير قابلة للنصح، مش بحب حد يعلق على سلوكي ولا ينصحني إلا هو كان بيقول لي اللي هو عايزه بطريقة أنا أحبها.. أثر كتير في شخصيتي، لما شافني أول مرة بمثل قال لي لازم تتعلم.. رحيله كان لحظة قاسية، كان أكتر حد حبيته، كان آخر 5 سنين بيمر بوعكة صحية كبيرة”.

أضاف” فتحي” باكيا: “أنا آسف مش عارف أتكلم.. أنا مش عارف أتكلم عنه بس هو علمني حاجات كتير، أنا والدتي ميتة وأختي رحمة الله عليها، ربنا يرحمه ويكون فخور بيا، إني حاولت على قد ما أقدر من اللي هو علمهولي”.

فيما روى “فتحي” موقف له مع والده قائلا: “والدي كان موظف في شركة وعنده شنطة فيها حاجاته، وأنا كنت صغير وعايز قلم رصاص وفتحت الشنطة وقلت له يا بابا أنا هاخد قلم رصاص قال لي لا وطلع ربع جنيه وقال لي هات لك واحد زيه، فأنا استغربت وقلت له ليه يا بابا؟ قال عشان مش بتاعي ده بتاع الشغل اتعلمت يعني إيه حاجة مش بتاعتك ماتخدهاش”.