دعاء فاروق ترد على انتقادات ملابسها: هو أنا عجبة؟!

ردت الإعلامية دعاء فاروق، على انتقادات بعض الجمهور لها على ملابسها، معبرة عن استيائها في ذلك.

نشرت “فاروق” عبر حسابها الرسمي على موقع التواصل الاجتماعي “فيسبوك”، قائلة إنها ترتدي ملابس بشكل يليق بالمكان الذي تذهب إليه مكملة: “تعودت منذ بداية حجابي على تغيير ستايل لبسي في كل مكان بشكل يناسب المكان، أرتدي في العمرة ورمضان والمساجد والصلوات عبايات، أرتدي في النادي مع الأولاد (ترينينج سوت أو جامب سوت)، أرتدي في البرنامج تايورات وكارديجان وجاكتات، وبدل وفساتين وأشكال مختلفة من الستايلات، أرتدي في الأفراح فساتين سواريه أو بدل سواريه، أرتدي على البحر بوركيني وعليه كاش شيفون واسع وساعات أحب ألبس فساتين واسعة على البحر، أرتدي في البيت بيجامة وحينما أفتح الباب للأغراب ألبس إسدال عليها لا أخرج بالإسدال ولا أرتدي عبايات طوال الوقت”.

نرشح لك: “بالصدفة”.. دعاء فاروق تحكي قصة دخولها المجال الإعلامي

أضافت أنها تجد راحتها في ارتداء ما يناسبها ويناسب المكان، موضحة: “أجد راحة في ارتداء ما يناسبني ويناسب المكان ألبس اللي يريحني ويناسبني ولا أفرضه علي أحد، ما الذى يدفع البعض للدخول فيا شمال طول الوقت بسبب لبسي؟! أنا عايشة عمري كله بلبس كده عادي هو أنا عجبة؟ يعني اللي بقوله ده وتصنيفة الهدوم دى عجبة؟ مش الناس بتلبس كده ولا أنا هبطت من كوكب المريخ بقرون وديل ولابسة أفاتار عشان كل صورة أنزلها خاصة بالشغل والعارضين اللي بعرض لهم تصميماتهم لازم أتقطم بكلمتين من بتوع بتتغيري وبتنزلي وبتطلعي وحجابك بيقل وشكلك ومنظرك وفيه نقطة أسفل الدقن تندب فيها رصاصة، وفيه سن نملة الدبانة، وفيه صابع مطرطق من الصندل طول الصيف جايب لي الكافية أوديه فين طيب؟ أدينا بنلمه بشراب في الشتا اللي هو شهرين بس، عشر شهور حر مبعرفش ألبس شرابات في الصيف، بتضرب صهد في النافوخ عدل، أخبيك فين يا صابعي سيبوا صابع رجلي في حاله”.

أردفت: “صلوا علي النبي يا جماعة واستغفروا الاستغفار بيجلب الرزق والله، جربوه كده كل ما أضايقك بسن نملة الدبانة أو صابع رجلي أو طرطوفة ودني استغفري علي طول والله أبرك من مليون تعليق، ربنا هيرزقك والله من وسع وهيفتحها عليكي (استغفروا ربكم إنه كان غفارا)، أستغفر الله العظيم من كل ذنب عظيم، ربنا يرزقنا ويرزقكم من وسع يا رب”.

في سياق آخر قالت الإعلامية دعاء فاروق إنها تؤمن بأن الله سبحانه وتعالى سيحاسبها إن لم تتقن في عملها، لذلك يجب عليها عرض كل الآراء الممكنة في كل المواضيع التي تتطرحها.

تابعت “فاروق” خلال لقائها على منصة “miniz”: “الحمدلله مفيش شيخ كبير من الأسماء الرنانة في مصر إلا وأنا اشتغلت معاه وعملت معاه سلسلة حلقات كبيرة، دايما بقول إن الشيوخ مش مضطرين يشتغلوا معايا لو أنا مضيقاهم، كل الأسماء المحترمة عملوا معايا سلاسل حلقات ومفيش حد منهم مشي من البرنامج زعلان وقال مش هشتغل مع دعاء تاني”.

أضافت: “حتى الأسماء اللي أنا مش بشتغل معاها دايما على تواصل معايا، لأننا بنخاطب العقل ولأننا مش بنعمل حديث الروح بتاع زمان.. لأ إحنا بنتكلم في مراضيع اجتماعية لازم نفتحها ونتناقش فيها”.

أردفت: “إيه الحرام في كده؟ إحنا بنسأل عشان نستفيد مش عشان الناس تقولنا اسكتوا، إحنا بنتناقش عشان لازم كل الآراء تطلع والناس تشوفها وتستفيد، أنا ربنا هيحاسبني لو معملتش شغلي على أكمل وجه عشان كده بتناقش في الموضوع وبفصصه حتة حتة”.

استطردت: “أنا ببقى عارفة إن ممكن رأي ما لشيخ يكون بينتصر ليه، لكن ممكن الرأي ده ميناسبش حد ما فأكيد في رأي تاني يناسبه لأن الفتوى تتغير بتغير المكان والزمان والأشخاص والظروف”.