عفاف رشاد: خلعت الحجاب بسبب مشكلة صحية

علقت الفنانة عفاف رشاد، على انتشار صورتها بدون حجاب، على مواقع التواصل الاجتماعي خلال الأيام الماضية، قائلة: “أنا مخضوضة”.

قالت “رشاد” خلال مداخلة هاتفية مع برنامج “مساء dmc”، مساء السبت، مع الإعلامية إيمان الحصري، عبر شاشة “dmc”، إنها غيرت صورة “البروفايل” الخاصة بحسابها على “فيس بوك” وفوجئت بانتشارها بشكل كبير.

نرشح لك:يسرا عن معاناتها مع كورونا: “محدش كان مصدق إني هعدي”

أوضحت أنها كانت تقدم أدوارا أغلبها تنحصر في دور الأم، لذلك لم يكن مطلوبا منها وضع “ميكب آب” للمصداقية، مردفة: “أنا حطيت الصورة ونمت تاني يوم لقيت الدنيا كلها اتقلبت، أنا معرفش يعني إيه تريند، ولما لقيت الكلام دا موجود اتبسطت من ردود الأفعال الطيبة، وفي ردود أفعال مش لطيفة ودا اللي يضايقني”.

لفتت إلى أن “الكوافير” الخاص بها هو من اختار لون شعرها، موضحة أن سيدة مغربية وضعت لها “ميكب آب” ونال إعجابها، وطلبت منهما تغيير صورة البروفايل الخاصة بها، مضيفة: “فأي واحدة بتغير صورة بروفايلها عادي، لا في دماغي أخلي الناس تلتفت ليا ولا أي حاجة إطلاقا، صحيت الصبح لقيت ناس بتكلمني وناس عايزاني أصور وأعمل مداخلات”.

أردفت: “أنا مكنتش بهتم أحط (ميكب آب) لكن كنت بهتم بالحاجات الطبيعية اللي في البيت زي الزبادي ومر البطارخ والبيض، وكنت محافظة على بشرتي مبرهقهاش، أنا عمري ما عملت عملية وأخاف أعملها ومضمنش بشرتي بعدها تبقى عاملة إيه، وليه ألعب في خلقة ربنا اللي خلقهالي حلوة أو وحشة”.

استكملت: “والله أنا مش سعيدة أنا خايفة، أول مرة أتعرض للموقف دا أنا ست في حالي، بخلص تصوير وأرجع البيت أشوف حاجتي، الحياة الطبيعية يعني”، لافتة إلى أن البعض علق بتعليقات مسيئة لها مثل: “هي بتعمل في نفسها كده ليه، هي عايزة تتجوز واحد عنده 15 سنة، أنا كنت بعمل أدوار تتطلب ألبس الحجاب، وفي ناس بتقول إني قولت متلبسوش حجاب ودا محصلش”.
أضافت: “أنا ست مريض صداع من وأنا صغيرة، لبست الحجاب في 2008، وقلعت الحجاب عشان كنت تعبانة وهما قالوا الست لما بتوصل 50 بتبقى من القواعد”، مشيرة إلى أن البعض وجه تعليقات تدعو عليها.

أكدت أن الموقف كان شيئا خاصا، مردفة: “غيرت صورة البروفايل ومكنتش عايزة أطلع ألفت الانتباه”.