سميحة أيوب عن حنان مطاوع: تسير على الدرب الصحيح

قالت الفنانة سميحة أيوب إن الفنان الحقيقي لا بد أن تكون شخصيته قوية لأنه يسيطر على الناس بحضوره، مضيفة: “حضوره اللي ربنا مديهوله، يعني الشخصية القوية دي الواحد مبياخدش فيتامين علشان يبقى شخصية قوية”.

تابعت “أيوب” خلال مداخلة هاتفية مع برنامج “فن مشكل” على إذاعة “شعبي إف أم” ويقدمه الإعلامي عمرو صلاح، أن الفنان في المسرح لا يستطيع أن يخطيء ويعيد مثل السينما، لأنه يكون واقفا أمام الجمهور لذلك لا بد أن يكون قويا، مضيفة: “عريان، بيبقى واقف عريان أمام الناس”.

نرشح لك: سميحة أيوب للجمهور: أحب جميع أدواري

ذكرت أنها شاركت في عدد كبير من المسرحيات الثقيلة، قائلة: “دلوقتي متقدرش تعمل ربع مسرحية منهم”.

استكملت: “الحمد لله إن أنا الأعمال اللي عملتها كلها كان الجو جميل، لأن إحنا كان يهمنا الفن، لا بنتخانق على فلوس ولا بنتخانق على ظهور ولا بنتخانق على أسامي، كل همنا إن إحنا نطلع العمل ناجح وإن إحنا ننجح”.

أشارت إلى أن العصر الآن أصبح مختلفا، موضحة: “بقى اسمي هيتحط فين وهتدفعوا كام من قبل ما يقرووا، إيه المبهر إنك تقولي عايزك تشتغلي معايا، أقولك هتدفع كام من غير ما أعرف إيه اللي هشتغله؟”.

ذكرت أن الآن حدثت متغيرات في المزاج والذوق والألفاظ، مضيفة أن ألفاظ الشارع أصبحت سوقية، والكلام كان محسوب من قبل، والصغير يحترم الكبير، مضيفة أن الإنسان لا يتجزأ ويصبح نجم بكل مفرداته.

أردفت أن يكون إنسان مهذب ومثقف ويحترم الآخرين ويعمل بجد، مضيفة: “هل فيه حد من الجيل الجديد بقى اسمه زي حد من الجيل القديم؟ اسم علم؟ لغاية دلوقتي لا علشان السلوكيات، الكبير كبير في سلوكه وتعامله مع الناس وشغله”.

قالت إنها ترى أن الفنانة حنان مطاوع جيدة جدا وتسير على الدرب الصحيح، لأنها من بيت ملتزم لذلك تتقدم وتتطور، مضيفة أنها تحب مشاهدتها.