تامر أمين لـ دينا الشربيني: متتكلميش عن علاقتك بعمرو دياب

دنيا شمعة

قال الإعلامي تامر أمين، إن تصريحات الفنانة دينا الشربيني الأخيرة، كانت تقصد بها الفنان عمرو دياب، وإنها لم تعجبه بالمرة.

تابع “أمين” خلال حلقة اليوم الثلاثاء من برنامجه “آخر النهار”: “خبر انفصال عمرو دياب ودينا الشربيني بقى مؤكد، وحاول بعض المقربين المصالحة بينهم لكن محصلش، لكن لما قريت تصريحات دينا الشربيني مؤخرًا بصراحة معجبتنيش، لإنها بصفة عامة مينفعش تتعمل من زوجة ضد زوجها اللي سابته، أصل خلاص انتوا سبتوا بعض وشكرًا.. يبقى لما نيجي نتكلم عليه نتكلم كويس”.

نرشح لك: شاهد.. رأي دينا الشربيني في الزواج

أضاف: “ميزة عمرو دياب إنه راجل عارف يقول إيه وميقولش إيه، وقليل الكلام ومحب للصمت زيادة عن اللزوم، وكثير الأفعال وعشان كده هو عمرو دياب، سواء لما اتجوز دينا الشربيني أو انفصل.. سمعتوه قال كلمة؟ لأنه بيحترم نفسه وبيحترم من معه”.

أردف: “أنا مبحبش أدخل جوا أسرار البيوت، بس أنا بقولك يا دينا ميصحش كدة، وبقولك متتكلميش تاني عن العلاقة اللي كانت بينك وبين عمرو، لما تحبي تتكلمي تقولي إن عمرو واحد من نجوم مصر وخلاص انفصلنا، لكن غير كده ميصحش من أي زوجه بصفة عامة، وميصحش خصوصًا لما يكون مع عمرو دياب اللي هو مبيغلطش في حد”.

اختتم: “عمرو دياب عمره ما رد على حد، رغم إنه عنده جمهور أكبر من أي نجم، ولو مسك حد هيمصمصه، وبيرد بنجاحه بس، عشان كده يا دينا شوفي طريقك وربنا يوفقك، ومتجبيش سيرة عمرو لا بالحلو ولا بالوحش”.