مينا فريد يكتب: الفيس في العسل (1)
مشهد واحد
القاهرة – مكتب السيد المسئول المهم جدا
قال السيد المسئول المهم جدا لمجموعة من السادة المسئولوين المهمين بس أمامه:
مانشيتات الصحف كلها هتتجنن بسبب كمية العنف اللي بقت في الشارع ! كمية الخناقات ماحصلتش في تاريخ مصر … حالات الطلاق وصلت لعشر أضعاف المعدلات الطبيعية … و حتى الصحفيين بيكتبوا كلام عجيب في الجرايد .. إحنا مش فاضيين للهبل ده.. مش هتتقلب البلد لفيلم النوم في العسل ..
قال أحد المسئولين الواقفين أمامه:
يافندم الناس بقت غريبة جدا .. ماشية تلطّش بعض في الشوارع …
قال السيد المسئول المهم جدا مداعبا شاربه بعصبية: 48 ساعة و تتصرفوا و إلا أقسم بالله هضطر أستدعي فريق عمل الفنان أحمد السقا اللي جابوله إبنه التايه في مسلسل ذهاب و عودة و أجيب كمان الأستاذ أحمد عبد العزيز من مسلسل قلب ميت يقود فريق العمل ..
قالوا بصوت واحد: تمام يافندم
هنا قطع حديثهم دخول رجل مفتول العضلات لمجلسهم بشارب ضخم …. قائلا .. أنا عارف سر القصة دي
“يا نهار أبيض خالد سليم “
قالوها بصوت جهوري و سكتوا بعدها …
مشهد إتنين
المنوفية – منزل موظف بسيط
القصة بتبدأ لما طالب ثانوي و طالب إعدادي قعدوا يتفرجوا على التليفزيون مع أبوهم و أمهم قبل رمضان لابسين الفانلات الداخلية و مستمتعين ببطيخة ساقعة ..
و جه في روتانا زمان فيلم أرض النفاق لفؤاد المهندس …
الفيلم عجبهم جدا و فكرة ان بودرة تترمي في النيل تخلي الناس تبطل نفاق جننهم..
و قرروا زي أي طالب إعدادي و ثانوي مصريين من المنوفيه يحترموا أنفسهم يخترعوا ده ..نظروا لبعضهم نظرة لها معنى فاهمينه كويس ..
على أنغام : تعالى نخللي الحلم حقيقة تعالى تعالى
بدأوا في التفكير و لكن هذه المرة بصورة مبتكرة…
مع نهاية رمضان نجحوا في تحقيق الحلم عن طريق٦ فيديوهات صغيره يتم نشرهم ع الفيسبوك بعنواين جذابه تغطي إهتمامات كل فئات الشعب ..
شاهد المقطع المحذوف في علاقة هانيا بصديقها.
شاهد قبل الحذف…. سقوط فستان بطلة كليب سيب ايدي اثناء مشاجرة مع هيفاء وهبي التي سقط فستانها أيضا … مكان التاتو مفاجأة.
شاهد قبر الفاسق عمر الشريف في ليلته الأولى عن طريق كاميرا خفية.
معجزة القديس ابوسطولوس البني سويفي … افتح الفيديو و شير لتحل عليك البركة.
شاهد و غيظ الإخوان الفيديو الذي ضحى خيرت الشاطر بكل ثروته في سبيل عدم نشره.
بالفيديو… هلاك زعيم الإنقلاب الدليل ان هذا هو شبيهه و مرسي راجع..
بمجرد مشاهدة أي من هذه الفيديوهات تنطلق آشعة تحت حلزونية تجعل المشاهد لمدة يومين بلا نفاق على الفيسبوك
*يعني صدقت كل إختراعات طلبة ثانوي بتوع المنوفية و جت على دي ؟؟*
مشهد تلاته
القاهرة – مكتب السيد المسئول المهم جدا
قال خالد سليم للجميع: بعد اللي عملوه العيال دول نقدر نقسم اللي حصل لتلات محاور رئيسية :
المحور الأول البنات …
كمية البوس المتبادل في الكومنتات إتحولت لنوع من السباب المباشر … مثلا ..
“زي القمر يا حبيبتي إمواااه” إتحولت ل
“فرحانة بصورتك أوي ياختي .. كله صناعي رموش و لينسز و بودرة و بوش أب.. عاوزة تعجبي معتز بس ده بعينك”
“مزة جامدة جداا إمواااه” إتحولت ل
“قال يعني البدي متزحلق في الصورة و إنتي مش واخدة بالك كل ده عشان معتز يعملك لايك …”
و طبعا ” ألف مبروك أختي مها و أخويا معتز ” لإتحولت ل
“خطبتي معتز .. طب والهي لأخدلك برنت سكريين من الشات اللي كنتي بتحكيلي فيه عن مصايبك مع أحمد لما جاب العربية الجديدة و بعدها سابك و خطب سحر ”
قال المسئول المهم: مين زفت معتز ده ..
-يافندم ده مجرد مثال طبعا اللي حصل بعد كده متوقع .. أخو مها شاف الكومنتات و طبعا معتز.. أخو مها إتخانق معاها و ضربها و معتز فركش مع مها .. ف مها راحت تتخانق مع صاحبتها .. و طبعا خطيبة أحمد و أهلها إتخانقوا معاه و فسخوا الخطوبة .. فراح أحمد يضرب صاحبة مها فأخوها وقفله … تخيل بكام كومنت بين واحدة و صاحبتها وقع كام واحد في بعض …
قيس ده على آلاف البنات اللي الأشعة تحت الحلزونية صابتهم … طبيعي تحصل مصيبة…
قطع حديثهم دخول أحد مساعدي المسئول المهم أوي .. إفتح يافندم برنامج نائل الدمرداشي .. فيه مصيبة حصلت …
تتبع ….