شاهد.. قصة إصابة محمود سعد بورم في المخ خلال المراهقة

دنيا شمعة

حكى الإعلامي محمود سعد ذكريات إصابته بورم في المخ، أثناء فترة مراهقته خلال الحلقة السادسة من سلسلة فيديوهات “أيام” التي يعرضها عبر قناته على موقع الفيديوهات “يوتيوب”.

قال “محمود”: “رحت عملت أشعة بالصبغة ودي كانت لسة طالعة جديدة.. كانت بـ 10 جنيه تقريبًا، قالي تاخد بنج ولا هتستحمل.. قلتله لا هستحمل عشان خفت يكون البنج غالي.. أداني حقنة كنت حاسس كأنها مية نار وداخلة دماغي”.

نرشح لك: سبب رفض محمود سعد إجراء حوارات صحفية

تابع: “فضلت نايم في السرير 5 أو 6 شهور بتعالج علاج طبيعي، بس في الفترة دي تعمقت علاقتي بأصدقائي.. كانوا مقسمين نفسهم واحد يبات معايا طول الليل وواحد يقعد معايا طول النهار”.

أردف: “كان فيه اقتراح يتعملي عملية، بس أمي خافت وقالت لا متكسروش دماغه.. لأن الموضوع ده كان جديد وقتها، بس الدكتور اقترح أنه يجيبلي واحدة اسمها نفيسة تعملي علاج طبيعي من السرير، وأداني أدوية كتيرة أوي.. وقال لأمي هخففهولك من السرير”.

أضاف: “كانت أيام صعبة جدًا.. أبويا مجاش شافني طول مرضي، مش عشان فلوس لأ.. مجاش يشوفني خالص، بس خفيت وبقيت زي القرد وخدت ثانوية عامة بعدها من أول مرة”.

يذكر أن محمود سعد بدأ تجربة جديدة، وهي نشر مقاطع فيديو عبر قناته على موقع اليوتيوب، يروي فيها حكايات من حياته المهنية والشخصية، ويقدم محمود سعد برنامج “باب الخلق” على شاشة النهار الساعة الثامنة مساء من الجمعة إلى الأحد.