عبد الله غلوش يكتب: غلوشيات رمضانية (3)
-اللي عملته اتصالات مع فودافون في اعلان العفريت ، معملتهوش فيفي عبده مع سمية الخشاب في “يانا ياانتي”.
-التجربة اثبتت ان سارة سلامة بدون هوت شورت… ممثلة عادية جدا.
-في يوم من الايام محمد الأمين مالك cbc تبني حملة لمقاطعة المسلسلات التركية بسبب موقف اردوغان من السيسي و30 يونيو ، والنهارده سايب احمد مكي يصور مسلسله كله هناك.
-حسن المستكاوي عمل تاريخ الكرة في مصر في سلسلة مقالات وبعد كده في كتاب ، ثم سيديهات ، ثم برنامج في مودرن وحاليا في اذاعة الشباب والرياضة.
-برنامج”RATING رمضان” .. خناقة بين 2 مذيعين علي مين فيهم يسأل الضيف اسئلة اكتر من التاني.
-هي إزاي صبا مبارك وافقت تشارك في بطولة مسلسل “حق ميت”؟
-لو ماخدتش بالك من اسمه ع التتر ، هتاخد وقت كبير عشان تعرف ان فراس سعيد هو اللي عامل دور سفير مصر في بيروت وجوز لقاء سويدان في ذهاب وعودة.
-البرازيل من غير نيمار ، زي لوسي من غير بوتكس.
-مشهد تعذيب اياد نصار في “حارة اليهود” ، اتعمل حلو اوي.
-رئيس وحدة سلامة الغذاء بوزارة الصناعة:لا توجد لحوم “حلال” فى مصر .. صلاح وعبدالفتاح طلعوا بيخدعونا بقالهم 40 سنة.
-احمد بدير في استاذ ورئيس قسم .. ياخوانا ياخوانا.
-كام واحد يعرف ان في مسلسل اسمه “اوراق التوت” بيتعرض في رمضان؟
-لو لم أكن متزوجا لوددت أن أتزوج نادين نجيم.
-شيرين رضا .. اجمل ما في مسلسل العهد.
-محمد فراج عمل فيلم بطولة ومنجحش ، مكابرش ورجع تاني يعمل ادوار تانية وناجح فيها جدا.
-برنامج عمرو خالد “الايمان والعصر”… ديكور حلو ومضمون مكرر.
-بين السرايات.. محمد شاهين مش لايق في دور البلطجي وباسم سمرة مش لايق في دور المحترم.
-محمد كريم .. يكفي ذكر اسمه للإطاحة بأي عمل.
-رجاء الجداوي عملت برنامج عن الستات في اوربت قامت هالة فاخر عملت برنامج للستات في صدي البلد .. رجاء الجداوي عملت VOICE OVER لقناة CBC سفرة ، قامت هالة فاخر عملت VOICE OVER لقناة بانوراما FOOD.
-س: من المسئول عن حذف جملة “نحلة ببزوز” من اعلان كرنش؟
-ربنا يرحمك يا أمي ويرحم امهاتنا جميعا ويخلي أمهاتكم يارب.