عبد الله غلوش يكتب: غلوشيات رمضانية (2)
– مع كاملة ابوذكري ، مع تامر محسن ، مع أي حد .. نيللي كريم تحب تتفرج عليها.
– فين منظمات حقوق المرأة من اعلان عمرو يوسف بتاع موسي كوست؟
– شيرين عبدالوهاب .. ممثلة هايلة بس في الكليبات فقط.
– اللهم ارزقنا قدرة شوبير علي الجمع بين اكتر من سبوبة في وقت واحد.
– كريم عبدالعزيز كتب اسمه قبل حسين فهمي ، وطارق لطفي كتب اسمه قبل فاروق الفيشاوي.. دامت لمين؟
– خير اللهم اجعله خير ، امير عيد (كايرو كي) معملش اي اعلانات جديدة بصوته لغاية النهارده.
– لو حسن الرداد استمر في نوعية الادوار اللي بيقدمها دي ، هايجي عليه يوم بعد 7 او 8 سنين بالكتير ويطلع في ادوار شرف ، زي ما هو جايب احمد عبدالعزيز في مسلسله كده.
– واضح ان مكي متأثر بغياب دنيا في “الكبير” ، وواضح ان مي كساب مفتقدة احمد الفيشاوي في “لما تامر ساب شوقية”.
– مبروك الدوري للزمالك
– مشهد عزاء زوج خالة رئيس الوزراء .. الأفضل في استاذ ورئيس قسم
– طوني خليفة بدون ماكياج وبدون منافس.
– عصير قمر الدين الجديد بتاع جهينة طعمه استغفر الله العظيم.
– اجمد 3 تترات .. وائل جسار “مريم” .. مرروان خوري “تشيللو” .. محمد فؤاد “أرض النعام”.
– صيغة اعلانات أم حسن .. تخليك تشك انهم كانوا بيبعوا لحم حمير فعلا.
– مشهد الحرب في فيلم “الرصاصة لا تزال في جيبي” اللي اتعمل سنة (1974) افضل بمراحل من اللي شفته (النهارده) في حارة اليهود.
– الجملة الأكثر تداولا ع الفيس بوك من امبارح بالليل (بحب اجيب A في كل حاجة .. المدرسة والبيت والحشيش والـsex).
– وش تاني .. بقينا في 2015 ولسه البودي جارد لما يجي يضرب حد في مشهد بيقول (هووه).
” -مصر قريبة” سبونسر لأهم المسلسلات الخليجية .. يارب يكون بفايدة.
– انجي المقدم .. في تطور مستمر.
– سمير غانم اكبر نقطة ضعف في لهفة.
– س : لما نص الداخلية يبقي مشغول في البحث عن ابن احمد السقا المخطوف والنص التاني مشغول في البحث عن قاتل ابن غادة عبدالرازق، مين هايحارب الإرهاب؟
– ربنا يرحمك يا أمي ويرحم امهاتنا جميعا ويخلي أمهاتكم يارب.