عبد الله غلوش يكتب: غلوشيات رمضانية (9)
– أيوب .. في حلقة واحدة، ٥ يا وسخة .. ٣ يا بنت الكلب.. ٢ يا واطية.. ٢ يا روح امك .. ١ يا بتاعة البيوت الشمال .. ١ يا قارحة .. ١ يا نجسة.
– أيوب .. اللي بيحصل بين دياب وأيتن عامر في المسلسل أخر حلقتين .. تطبيق حرفي لمقولة اللهم أضرب الظالمين بالظالمين.
– أيوب .. حضرتك في ٣ دخلوا يقتلوا أيوب جوه السجن، ايه لازمة لقطة العسكري اللي واقف في برج المراقبة تقفل بيها الحلقة؟
– الظهور الأول لـ رزان “رسايل” والظهور الأول لـ بسمة “اختفاء”.
– طايع .. أما ان للتاريخ أن ينصف سلوى محمد علي.
– طايع بيصوروا في جورجيا على أساس انها زيورخ ، وأهي ماشيه.
– مشاهد أحمد عز وفتحي عبد الوهاب “أبو عمر المصري” vs مشاهد ريهام عبد الغفور وباسل الخياط، على لقب الأقوى في رمضان الحالي.
– عزومة واحدة كفيلة انها تقضي على خريطتك البرامجية تماما.
– بيان تركي آل شيخ .. أحمد شوبير المسئول الأول عن الفضيحة دي.
– بالحجم العائلي .. قول على يحيى الفخراني زي ما تقول .. العبقري، العالمي، الممتع، السهل الممتنع، بس ده ميمنعش ان كمية المط والتطويل في المسلسل تفوق أي مسلسل تاني في شهر رمضان الحالي.
– مصر والكويت .. مستوى قرنبيطا ظوراتوس ع الأخر.
– مصر والكويت .. طب والله لو رامز اللي بيدرب هنلعب كورة أجمل من كده.
– مصر والكويت .. رمضان صبحي نسى الكورة.
– مصر والكويت .. شيكابالا .. أناني بالسليقه.
– مصر والكويت .. كوكا .. وردة .. عمر جابر .. متفهمش محترفين على أي أساس.
– مصر والكويت .. الونش .. الدوري غير الدولي يابو الكباتن.
– مصر والكويت .. شريف إكرامي .. مفيش فايدة.
– سليم الانصاري خرج من المستشفي وأيوب دخل المستشفى.
– خالد أنور خرج من السجن “عوالم خفية” ونور هربت من السجن “رحيم”.
– ياسمين غيث “رحيم”، عادل أمين “الرحلة” .. أحدث حالات الوفاة في دراما رمضان.
– كلبش .. أحمد صلاح حسني كلمة السر في الحلقات الجاية.
– الوصية .. لليوم التالت ع التوالي، non stop laughing.
– إعلان أوبر .. من حيث التنفيذ، الاعلان عالمي.
– إعلان أوبر .. من حيث الفكرة، كلام الـ voice over وطريقة الإلقاء فيها شبه كبير من إعلان صلاح مع فودافون.
– إعلان أوبر .. من حيث المنطق، هو صلاح بيركب أوبر أصلا؟
– 30 ليلة وليلة .. لو لقيته بالصدفة على اي قناة من القنوات اللي بتعرضه، نصيحة حول بسرعة.
– اختفاء .. اول مسلسل puzzle في تاريخ الدراما المصرية.
– اختفاء .. محمد ممدوح طلع ظابط وسبحان الله طلع بشنب برضه.
– لدينا أقوال أخرى .. هبة عبد الغني أفضل حاجة في اخر 4 حلقات من المسلسل.
– اذكر اسم مسلسل واحد لم يشر من قريب أو بعيد لظاهرة الثأر في دراما هذا العام؟
– رسايل .. لسه بسأل نفسي هو ازاي خالد سليم مستحمل مي عز الدين كل ده، لقيته راح يشتكيها لأحمد خليل.
– رسايل .. تقريبا دي الحلقة الوحيدة من أول رمضان اللي مي عز الدين مقالتش فيها أي رسالة من بداية المسلسل.
– نسر الصعيد .. من كتر ما مشهد المطارده اللي في أول الحلقة مستوحى من ألعاب البلاي استيشن، كان المفروض محمد رمضان يقول لزعيم العصابة في اخره جيم أوفر بدل من سلم نفسك.
– نسر الصعيد .. العلاقة بين عائشه بن أحمد والبومات مصطفى كامل بتقتلني ضحك.
– نسر الصعيد .. مشاهد أحمد خالد صالح في فرقة المظلات ، واقعية جدا.
– الرحلة .. عجبني فكرة حوار وليد فواز مع برنامج السفيرة عزيزة تحديدا .
– عوالم خفية .. علم المثليين يظهر لأول مرة في الدراما المصرية.
– ليالي أوجيني .. مريم الخشت تحسها من مواليد زمن أوجيني أصلا.
– ليالي أوجيني .. بدون حدث واحد مهم من الحلقة التانية، بس المود حلو.
– يسرا في الإعلان بتاعها مستفزة أكتر من الست بتاعه ما تديها لهم ببلاش أحسن.
– لفته حلوه من روتانا كلاسيك بتعرض أفلام حرب أكتوبر من الصبح بمناسبة 10 رمضان والقنوات المصرية ولا كأنها هنا.
– فوق السحاب .. هاني سلامة المفروض انه مخطوف في نزلة السمان، مع ان خلفية الكادر كان فيها مستشفى زايد التخصصي عادي.
– اللي يلقى دلع وميدلعش يبقى لامؤاخذه .. سيد رجب “نسر الصعيد”.
-الواحد لما بيهرب، مبيفرقش معاه هو رايح فين .. أمينة خليل “ليالي أوجيني”.
– ربنا يرحمك يا أمي ويرحم امهاتنا جميعا ويحفظ امهاتكم يارب.