عبد الله غلوش يكتب: غلوشيات رمضانية (11)
– أوسطه مغفرة.
– بداية من اليوم ، ممكن تبطل تتابع اي مسلسل وتتفرج على آخر حلقتين منه ومش هاتحس انه فاتك كتير.
– بعد 11 يوم ، فودافون تداركت خطأها بإعلان جديد يوضح المقصود من كارت الفرحه في اعلان تامر وشيرين.
– واحة الغروب .. ركين سعد “مليكة” ممثلة تحب تتفرج عليها.
– اللي يشوف اعلان جينفر لوبيز لطيران الإمارات ، ويشوف بعده اعلان محمد نور لمصر للطيران ، تصعب عليه البلد دي أوي.
– غياب محمود عبد المغني عن أي حلقة من “ظل الرئيس” ، المسلسل بيفقد نصف قوته.
– غياب محمود عبد المغني عن أي حلقة من ” الحساب يجمع ” مابتحسش بأي تأثير.
– أبو أحمد مكي كان بيشجع حرس الحدود ومصاحب جهاد جريشة .. ملخص آخر 5 حلقات من خلصانة بشياكة.
– بيتر ميمي “كلابش” ، حسام علي “30 يوم” .. أكبر مكاسب رمضان 2017.
– حلاوة الدنيا .. كلاكيت 11 مرة ، هند صبري ممثلة عالمية.
شاهد الحلقة الحادية عشر من المسلسل الرومانسي الكوميدي (الحب الحب)
– هذا المساء ، في حلقة واحدة إياد نصار احتفل بالـ anniversary بتاعه مع أروى جودة ، وطلب الزواج من حنان مطاوع.
– هذا المساء .. أسماء أبو اليزيد بتقول لأحمد داوود “خلاص مفيش وقت لازم أمشي عشان ألحق المعاد بتاعي الساعة 8 “.. رغم ان الساعة في ايد أحمد داوود كانت عشرة ونص.
– ريم مصطفى “كلابش” ، “عشم أبليس” ، ” اللهم اني صايم” .. أفضل تشكيلة أحذية وبوتات في دراما هذا العام.
– أرض جو .. حتي الآن مش عارف واحد زي أحمد فؤاد سليم يخلف واحدة زي غادة عبدالرازق ازاي؟
– كفر دلهاب .. يوسف الشريف ناقص يعمل مبادرة صبح علي الكفر بجنية، عشان يقنعنا انه بيتكلم عن مصر الآن.
– كفر دلهاب .. مش عارف ليه المسلسل قلب فجأة علي فوازير ألف ليلة وليلة.
– الحصان الأسود .. أفضل أدوار بيومي فؤاد السنة دي.
– يتبرع في السر أو في العلن .. يدخل الجيش أو مايدخلش .. يشتري عربيات غالية أو رخيصة .. يظل محمد رمضان هو أذكى نجوم الجيل الحالي.
– حمدي الوزير مشارك في “وضع أمني” بنفسه وبصورته في “خلصانة بشياكة”.
– من السذاجة أن مدام إسعاد يونس أو أي حد في البلد دي يتوقع ان الفساد هايختفي بمجرد ما نبص في المراية.
– محمود الليثي “خطيب ريهام عبد الغفور لا تطفئ الشمس ” .. أفضل نجوم برنامج (snl بالعربي) في دراما هذا العام .. تامر فرج “زوج أخت إياد نصار هذا المساء” أبرز نجوم برنامج (أسعد الله مساءكم) في رمضان السنة دي.
– لأعلي سعر .. عدد الأصوات الوحشة اللي اكتشفها نبيل الحلفاوي في المسلسل ، أكتر من عدد المطربات اللي حلمي بكر اكتشفهم واتجوزهم طول حياته.
– لأعلي سعر .. الظهور الأول لمي كساب.
– هند صبري فسخت خطوبتها من هاني عادل “حلاوة الدنيا” ، ونيللي كريم رفعت قضية خلع من أحمد فهمي “لأعلي سعر”.
– 30 يوم .. انك تزود مساحة الفاصل الإعلاني أفضل بكتير من الفرجة علي مشهد 3 دقايق كاملة لنجلاء بدر وهي بتولع وتشرب وتنفخ في سجارة واحدة.
– سواء في ” هربانة منها ” أو “الحلال” .. خدود فادية عبد الغني مثيرة للإشمئزاز.
– لا تطفئ الشمس .. محمد ممدوح بدأ يمثل فعليا من حلقة النهاردة.
– لا تطفئ الشمس .. هو المسلسل في كام أمينة خليل عشان مايتعملهاش فرح وتتجوز بالشكل ده.
– لا تطفئ الشمس .. اللي يشوف اداء ريهام عبد الغفور في المسلسل ، مايتوقعش أبدا انها توافق على دور فلات زي اللي بتعمله في “الزيبق”.
– لولا وجودها علي التتر ، محدش كان عرف ان مي عمر مشاركة في “عفاريت عدلي علام”.
– اللي عملته هالة صدقي السنة اللي فاتت في ونوس ، ضيعته السنة دي في “عفاريت عدلي علام”.
– مسلسل أحمد حلمي ومنى زكي الإذاعي “شطة هندي” علي ميجا fm .. المعني الحرفي لكلمة سبوبة.
– انك تعيش الحقيقة مهما كانت صعبة أو مره اهون بكتير انك تعيش في وهم وكدبة كبيرة وتصحى فجأة تلاقي كل حاجه حواليك بتنهار .. انوشكا “حلاوة الدنيا”.
– الوقت اللى هتقارن فيه بين كرامتك وحبك .. هو الوقت اللى لازم تنهي فيه العلاقة فورا “الحصان الأسود”.
– أكتر كلمة بنضحك بيها على نفسنا ، مفيش حاجة تستاهل ، لأن الحقيقة في حياتنا حاجات كتير تستاهل .. ياسر جلال “ظل الرئيس”.
– مفيش تعب بيفوت بالساهل لازم إراده معاه .. أصالة “500500”.
– ربنا يرحمك يا أمي ويرحم أمهاتنا جميعًا ويخلي أمهاتكم يارب.
نرشح لك : عبد الله غلوش يكتب: غلوشيات رمضانية (10)