عبد الله غلوش يكتب: غلوشيات رمضانية (1)
– عمر حسن يوسف “كلابش” .. أشرف زكي “الحالة ج” ياسر علي ماهر “الحساب يجمع” .. ضحايا اليوم الأول في رمضان.
– لما ريم مصطفي تقول لمصطفي شعبان إنت مز وقمر في “اللهم إني صائم” ، طبيعي إن عمرو يوسف يطلقها في أول حلقة من “عشم إبليس”.
– اقترح علي منتج مسلسل “شاش في قطن” يرجعوا اسمه القديم مرة تانية لأنه الوصف الأدق لفكرة عرضه في قناة الحياة.
– 11 مساءً علي on e عملية احتجاز رهائن في طيارة ” أرض جو”.
– 11 مساءً علي on drama عملية احتجاز رهائن في مستشفي “وضع أمني”.
– حلاوة الدنيا .. هند صبري وهي ماسكه فستان الفرح وسط إخواتها بعد ما عمها مصطفى فهمي بلغها بإصابتها بالسرطان .. المشهد الأفضل في اليوم الأول من رمضان.
– لو حملة فودافون ليها هدف ورسالة زي حملة زين، أكيد مكنتش أجلت عرضها بحجة الحداد.
– أرض جو .. مبدئيا مينفعش تشوف دنيا سمير غانم في دور مضيفه طيران وبعدها تشوف غادة عبدالرازق في نفس الدور.
– أرض جو .. نفسي اعرف رد فعل صلاح الدين الأيوبي لما يعرف إن محمد كريم طالع اسمه يوسف زيدان.
– أرض جو .. لما تكتشف إن فيديوهات محمد كريم علي الفيس بوك مهما كانت سمجه ولذجه، تظل أرحم بكتير من إنك تتابعه كممثل في مسلسل 30 حلقة.
– أرض جو .. أول مرة أعرف إن في شركة طيران تانية غير مصر للطيران، بتقدم لركابها عصير فرجللو.
– عبارات رثاء المصريين لكوبيات النسكافيه ومجات الكابيتشينو على الفيسبوك فاقت تلك الموجهة لضحايا حادث المنيا الإرهابي.
– شطرنج شريف منير ، الشيء الوحيد اللافت للنظر في الحلقة الأولى من الزيبق.
– لأعلي سعر .. أفضل بكتير من مسلسل نيللي كريم الأخير “سقوط حر”.
– الهيبة .. النسخة اللبناني من الضوء الشادر.
– سعيد بعودة بسام رجب وشريف خير الله وصفوة.
– لا تطفئ الشمس .. للسنة التانية علي التوالي عارفه عبد الرسول مسخرة.
– لا تطفئ الشمس .. أحمد مالك أول سائق أوبر في الدراما المصرية.
– كفر دلهاب .. المسلسل بدأ بجملة “احنا داخلين علي أيام سودا” .. الحدق يفهم.
– كفر دلهاب .. سحر الصايغ هتكون من نجمات رمضان السنة دي.
– مسلسل قصر العشاق احتمال لو كان اتعرض في التمانينات مش السنة دي، كان هيفشل برضه.
– عمرو يوسف عشم إبليس .. مي عمر ريح المدام .. ياسمين عبد العزيز هربانه منها .. ٣حالات فقدان ذاكره في يوم واحد و الـ ٣ نتيجة حوادث سيارات.
– بعكس السنه اللي فاتت، تواجد بيومي فؤاد في أي عمل أصبح شئ منفر أكتر ما هو عنصر جذب.
– محمد كريم “أرض جو” ينافس فادية عبدالغني “الحلال” علي لقب أكبر خد بوتكس في دراما هذا العام.
– اللهم إني صايم .. جديدة فكرة أنك تعمل أغنية في نهاية كل حلقة تشرح فيها للناس كان إيه المقصود منها بالظبط.
– اللهم إني صايم .. غياب ماجدة زكي عن أول حلقة غلطة كبيرة.
– الفرق بين خفة الدم الرباني والمصطنعة، هو الفرق بين دنيا سمير غانم وياسمين عبد العزيز.
– لما القنوات الخليجية حبت تعمل نسخة خليجية من عالم سمسم، سموها “افتح يا سمسم”.
– عمر زهران رئيس نايل سينما السابق ضيف شرف أول حلقة من “هذا المساء”، ودينا رامز رئيس نايل لايف السابق ضيفة شرف أول حلقة من “اللهم إني صائم”.
– عزت أبو عوف بالباروكة في اللهم إني صايم وبدون باروكة في عفاريت عدلي علام .. هاله فاخر بالباروكه في كلابش وبالحجاب في لمعي القط.
– في نفس اليوم ، حنان مطاوع اترمي عليها ميه من بلكونة أم دعاء في “هذا المساء” وعربيه طرطشت عليها ميه في “حلاوة الدنيا”.
– محمد فراج “هذا المساء” ومصطفى خاطر “هربانه منها” .. الاتنين شغالين في محلات موبايل وبيبتزوا البنات بالحاجات اللي عليها.
– الحرباية .. أول 12 دقيقة من الحلقة منذر رياحنه بيجري ورا واحد في الشارع من غير ما يقول ولا كلمة.
– الحرباية .. توفيرا للوقت والمجهود ، ملخص الحلقة.. هيفاء كانت بتخيط فستانها، ولما خلصت بتقطع حته خيط زيادة، سنتها اتكسرت وقعدت تخر دم وتبص علي الدم وتعيط.
– ١١ مساء .. ١ صباحا .. ٧ صباحا .. ٦ مساء .. دي المواعيد اللي قناة النهار مش بتعرض فيها مسلسل ريح المدام.
– يسرا اللوزي .. بقعة ضوء في مسلسل الحلال.
– خلصانة بشياكة .. بيعجبني ثقة أحمد مكي في دماغه.
– خلصانة بشياكة .. أحمد أمين أجمل ما في الحلقة الأولي.
– خلصانه بشياكة .. وإنت بتتفرج هايجيلك إحساس إنك بتشوف أبله فاهيتا مش مسلسل رمضاني.
– واحة الغروب والجماعة .. إنتاج يفرح لكن لسه بدري في الحكم على المضمون.
– أفضل مسلسل : لا تطفئ الشمس – الحصان الأسود – الحساب يجمع.
– أفضل تتر : أصالة “لا تطفئ الشمس” – نوال الزغبي “لأعلي سعر” – أحمد شيبة “اللهم إني صايم” – أنغام “قلبي معي”.
– أفضل إعلان .. زين للاتصالات – فاركو للأدوية – الطفل حازم 57357.
– الست لما بترفع الشبشب بتاعها بتبقى عارفه كويس هو رايح فين .. لطفي لبيب “عفاريت عدلي علام”.
– أنا دكتور تجميل يعني الصياعة علي النسوان دي لعبتي .. عمرو يوسف عشم إبليس.
– اللي يصون لقمة عيشه .. لقمة عيشه تصونه .. يسرا الحساب يجمع.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.