عبدالله غلوش يكتب: غلوشيات رمضانية 14
– مش عارف مين اخترع فكرة أن اسم البطل التاني للمسلسل يتكتب قبل اسم المخرج عشان ما يتقمصش؟
– الأسطورة.. بعد منافسه شرسه مع “أفراح القبة والخانكة و أزمة نسب”، أقدر أقول بقلب مطمئن وضمير مرتاح، إنه المسلسل رقم 1 في أكبر عدد من “يا روح أمك” في دراما هذا العام.
– الأسطورة.. آخر مرة شفت فيها دنيا عبدالعزيز بتمثل كويس، كان في الجزء التاني من “عائلة ونيس”.
– الأسطورة.. لو محمد رمضان كان داخل بـ 2 كيلو برتقال، كان هيبقي رد فعل مي عمر وفردوس عبدالحميد على خروجه من السجن أفضل من كده.
– الأسطورة.. صدمة عايدة رياض في جوزها “زكريا العايق”، مش أد صدمتي لما شفته الصبح في فقرة “اسأل طبيبك” على قناة “ten” وعرفت إنه واحد من أكبر دكاترة السكر والغدد الصماء في مصر.
– طالما الأزهر منح رخصه للاعيبه عشان تفطر، يبقى ياريت نقول للزمالك مبروك من غير ما نتبعها بأي مبررات.
– أفراح القبة.. بدأت أزهق من كمية الفلاش باك المبرر والغير مبرر في المسلسل.
– أفراح القبة .. جرأة صابرين تخطت فكرة أستبدال الحجاب بالباروكة ، بمراحل.
– أفراح القبة.. هو في إمكانية نشوف منى زكي مرة تانية في المسلسل، ولا نعمل حسابنا علي فيلم “من 30 سنة” في العيد؟
– للسنة الثالثة علي التوالي، تحية من القلب للمخرج اللي بيختار الموديلز في إعلانات يونيفرسال.
– سقوط حر.. بعد كل السنين اللي غابتها، كنت متوقع عودة أقوى من كده لوفاء صادق.
– سقوط حر.. أول ما شفت عزة بهاء وهي بتزعق لبنتها، افتكرتها على طول وهي بتقول لعادل إمام في “الواد سيد الشغال” ، إنت شديد أوي مع الموظفين بتوعك.
– سقوط حر.. والله ما كان هيجري حاجة لو نيللي كريم كانت قتلت ظافر عابدين في نهاية “تحت السيطرة”، وكانوا عملوا جزء تاني من المسلسل أحسن.
– سقوط حر.. فريال يوسف عندها قدرة غير عادية بعد كل مشهد بتظهر فيه، إنك تلاقي نفسك تلقائيا بتدعي على اللي خلاها هي ودرة يمثلوا في مصر.
– أوصيكم ونفسي في النصف الثاني من رمضان، بضرورة الانتباه إننا لسه داخلين على كحك وفسيخ وبيتي فور.
– مأمون وشركاه.. خايف بعد المسلسل ما بدأ يحلو، خالد سليم يجي يقفلني منه مرة تانية.
– مأمون وشركاه.. مشهد أمن الدولة في حلقة امبارح صورة بالكربون من نفس المشهد في فيلم “عريس من جهة أمنية”، ومشهد تمارين زوجة ابنه الإيطالية منحوت من مشاهد نيكول سابا في “التجربة الدنماركية”.
– فوق مستوى الشبهات.. عبدالله حسن وأمين جمال.. مكسب كبير لكتابة السيناريو في مصر.
– فوق مستوي الشبهات.. نفسي أعرف باسل الزارو وهو بيتفرج على ماتش بتروجيت والإنتاج الحربي، كان بيشجع مين؟
– نيللي وشريهان.. آخر حاجة كنت ممكن أتخيلها إن عم دهب بعد كل العمر ده يطلع في الآخر محمود الجندي.
– الخانكة.. كنت منتظر إن أحمد الشامي “واما” يكون مشارك في المسلسل عشان يعرفنا إنه بيعرف يمثل، مش يعرفنا إنه بيشرب مارلبورو أحمر.
– معيارك في الحكم على الدكتور اللي عيادته على آخرها، أو الميكانيكي اللي ورشته مافيهاش مكان لعربية، هو عالجك صح وصلحلك عربيتك كويس ولا لأ ؟.. أتمني نتعامل مع بيومي فؤاد بالمنطق ده.
– ماليش إيد بتوجعني عشان حد يمسكني منها وعيني مش إزاز عشان حد يكسرها.. يوسف الشريف “القيصر”.
– الجنة مش بيدخلوها باللبس، بيدخلوها بالمعاملة والكلمة الطيبة والوش البشوش.. لبلبة “مأمون وشركاه”.
– يابنتي افتحي الكباريه بتاع أمك الله يرحمها، ماتقطعيش عيش البنات، وتحمليها ذنوب أكتر من كده.. يحيى الفخراني “ونوس”.
– عائلتك هي الشيء الوحيد الصادق الذي سيبقى معك حتي النهاية ، لا تنخدع بزحمة العلاقات.. أحمد الشقيري “قمرة”.
– ربنا يرحمك يا أمي ويرحم أمهاتنا جميعا ويخلي أمهاتكم يارب.
نرشح لك
عبد الله غلوش يكتب: غلوشيات رمضانية 13
شارك واختر.. ما هو المسلسل الكوميدي الذي تتابعه في رمضان؟ اضغط هنـــا
