عبد الله غلوش يكتب : غلوشيات رمضانية 2
– مكنتش أتخيل إني ممكن أشوف حد أرخم من “الخليل الكوميدي”، لغاية ما شفت حلقة النهارده من “هبة رجل الغراب”.
– الخانكة.. غاده عبدالرازق راكبه سكوتر وزعلانه إن كل اللي يشوفها بيقولها يا ماكنه راكبه ماكنه.
– الخانكة.. المشكله إن غاده عبدالرازق لو مٌدرسة ألعاب فعلا في الحقيقة، كان هيحصل فيها أكتر بكتير من اللي هيحصلها في المسلسل.
– بنك مصر.. اللي بتغني أغنية طوبة فوق طوبة في الإعلان لازم تتحول لمحاكمة عسكرية فورا.
– أفراح القبة.. عجباني ثقة محمد ياسين في محمد الشرنوبي.
– أفراح القبة.. صبا مبارك جبارة برغم إن ستايل هدومها نشاز عن باقي ابطال المسلسل.
– أفراح القبة .. جمال سليمان واللكنة المصرية.. مفيش فايدة.
– أفراح القبة.. أفضل أداء تمثيلي لصابرين من فترة طويلة، وأفضل باروكة لصابرين من وقت ما اتحجبت.
– “بلدك التانية فيها حاجات كتير حلوة لسه مشوفتهاش”.. حملة إعلانية محترمة لوزارة السياحة على الفضائيات الخليجية في رمضان، بس يارب تبقى بفايدة.
– الأسطورة.. فردوس عبدالحميد كان ليها وحشه والله.
– الأسطورة.. في جنب دار القضاء بتاع 30 محل بدل وقمصان كلاسيك، ماتفهمش بقى ليه محمد رمضان قعد يجري بتاع 5 دقايق لغاية ما لقى محل يشتري منه قميص.
– شيكو “العقيد تيسير فهمي” أجمل ما في حلقة نيللي وشيريهان النهارده.
– انا لو مكان الحكومة، أعين الواد الأدمن بتاع صفحة “ِشاومينج” وزير تعليم.
– شهادة ميلاد.. بيومي فؤاد عامل مشهد واحد بس في المسلسل بس أفضل من أدوار كتير تانية عملها السنة دي.
– شهادة ميلاد.. الممثلة إنجي المقدم، في تطور مستمر.
– شهادة ميلاد.. مسلسل حلو بس ما يجبركش تتابعه على حساب أعمال تانية.
– أبوالبنات VS فوق مستوي الشبهات .. ماونتن فيو VS بالم هيلز.
– ونوس.. لما تستمتع بالتمثيل فتمتع اللي بيتفرجوا عليك.. أهو ده اللي بيعملوا يحيي الفخراني بالظبط.
– ونوس.. أمين أبوحافه أجمد موسيقى تصويريه في مسلسلات رمضان.
– خلق القانون لكي يخرق وعشان يخرق بيدفع له شوية فلوس صغيرة أد كده.. وليد فواز “سبع أرواح”.
– فوق مستوى الشبهات.. ناقص مريم السعيد بس ويبقى طقم مذيعين et بالعربي كله مشاركين في بطولة المسلسل.
– فوق مستوى الشبهات.. نفسي أشوف نجلاء بدر في دور واحدة ست شريفة قبل ما أموت.
– بيببهات جهينة علموا على كل نجوم الإعلانات السنة دي.
– لو بالصدفة حظك السيء قادك لواحدة من القنوات اللي بتذيع مسلسل “بس مباشر” بطريق الخطأ ، إلغي القناة من الريسيفر على طول عشان متكررهاش مرة تانية.
– ربنا يرحمك يا أمي ويرحم أمهاتنا جميعا ويخلي أمهاتكم يارب.
نرشح لك
عبد الله غلوش يكتب : غلوشيات رمضانية 1
تفاصيل الدورة الثانية لمهرجان “إعلام.أورج” رمضان 2016
بالساعة والدقيقة.. مواعيد مسلسلات رمضان 2016
شارك واختار من النجم الأفضل في إعلان فودافون رمضان ٢٠١٦؟ اضغط هنـــا
