مؤمن المحمدي يكتب: بالمناسبة (26) ابن النادي
ومن الماتشات اللي الواحد ما ينساهاش لـ الأهلي مع الشرطة، ماتش في موسم 2009/ 2010، أيام حسام البدري، وده من الماتشات اللي الدنيا راحت فيها وجت، وانتهت بـ فوز كبير لـ الأهلي.
الشوط الأول انتهى صفر/ صفر، والشوط التاني بدأ بـ هدف لـ الشرطة سجله العزب لاعب الشرطة، فـ راح حسام البدري عمل تغييرين مجانين شوية، طلع أسامة حسني ونزل مصطفى عفروتو، في أول ظهور ليه مع الأهلي، ثم سحب بركات ونزل أحمد شكري، وشكري هو اللي كان اختاره وليد صلاح الدين يسلمه الفانلة نمرة 10، اللي استلمها وليد من الخطيب في ماتش اعتزاله الشهير؟
أصلا حسام كان بادئ الماتش بـ لاعب صغير في الدفاع هو محمد سمير، ولاعب في الوسط هو عبد الله فاروق، فـ الملعب اتبدر لاعيبة صغيرة، والأهلي رد على جون الشرطة بـ تلاتة: الأول عفروتو، والتاني شكري، والتالت ضربة جزاء جابها عفروتو وسجلها محمد سمير، ولما الشرطة جابت هدف تاني، وحاولت ترجع الماتش بـ التعادل، عفروتو قتله بـ جون رابع.
ليه الواحد فاكر الماتش ده بـ تفاصيله؟
علشان فيه سؤال: فين كل اللاعيبة دي دلوقتي: عفروتو وشكري وفاروق وسمير، ومعاهم شهاب الدين أحمد، اللي ظهر في نفس الموسم؟
إجابة السؤال ده ترد لك على الأسطورة الحمضانة بتاعة “ابن النادي”، مفيش حاجة اسمها كده، ومفيش حاجة اسمها لما ناشئ يتألق في ماتش أو موسم، نقول عليه: “مستقبل الأهلي”، وفيه مفاهيم كتيرة ورثناها من الستينات وما قبلها وما بعدها بـ شوية ضروري تتنسف نسف.
فيه حاجة اسمها النادي الأهلي، وإحنا اتعلمنا إن “الأهلي بـ من حضر”، ومش بس بـ الكلام الكبير، خلينا نفكر فيها بـ العقل.
دلوقتي عندنا موسم بـ يبدأ، دي حاجة بـ تحصل كل موسم، إنت مطالب بـ إنك تبقى أقوى فريق، عندك أفضل لاعيبة في كل مركز، مش فارق بقى يبقوا صاعدين من الناشئين، شاريهم من السوق، طابعهم في البنك، المهم إن عندك تلاتين لاعب، أو 25 حسب المسموح بيه، تكسب بيهم أي فريق في مصر وأفريقيا.
ده من ناحيتك، ومن ناحية اللاعب، إنت عقدك معاه مش أبدي زي زمان، كان اللاعب لما يتقيد في نادي، يفضل النادي ده من حقه يقيده كل سنة، لـ حد ما يعتزل، إلا إذا اداله الاستغنا، علشان كده كان فيه حاجة اسمها ابن النادي، دلوقتي إنت عقدك مع اللاعب كام موسم، وبعدها ينتني عليك ويتفرد، ويقول لك مش عارف مين بـ يفاوضني، وتأمين مستقبلي، وحلم الاحتراف، وإلخ إلخ.
اللي حاصل ده بـ يخلي الموضوع فيه حركة دايمة، واللاعب ده النهارده هنا، بكرة هناك، عادي، هو عفروتو يعني النهارده يلعب على حساب مين لو في الأهلي؟ ولا شكري؟ ولا بقية اللاعيبة، مع احترامي الشديد، وحبي ليهم ولـ موهبتهم.
فـ اللاعيبة في حالة تنافس مستمرة علشان يوصلوا أحسن المستويات، ويلعبوا في أحسن الفرق، وياخدوا أحسن فلوس، وشفنا لاعيبة راحت وجت كذا مرة بعد ما ده كان مستحيل، محمد فضل وأحمد شديد قناوي وأحمد صديق، وغيرهم وغيرهم، وده مش المفروض يتقابل بـ حساسية.
وخلاصة الموضوع ده بـ النسبة لي: أنا مش بـ أشجع لاعيبة، أنا بـ أشجع نادي، اسمه الأهلي، اللي يلبس فانلته بـ أشجعه طول ما هو لابسها، أول ما يخلعها لـ أي سبب، ما بقاش يخصني، وربنا يوفقه في أي مكان، كمان مش بـ أنسى أي حد قدم لـ الأهلي، مهما كان اللي قدمه قليل، موسم، ماتش، كورة حلوة حتى، وطبعا على قد ما بـ يقدم، على قد ما يحتفظ بـ مكان.
ابن النادي هو اللي في المستطيل الأخضر بـ الفانلة الحمرا: الآن وهنا وبس