"مبهزرش".. توضيح من دعاء فاروق بشأن عيد ميلادها

أوضحت الإعلامية دعاء فاروق، تفاصيل قرارها بالاحتفال بعيد ميلادها الخمسين، من خلال التبرع لصالح مستشفى بهية، مؤكدة أنها لن تقبل أي هدايا أو احتفال خاص.

قالت "فاروق" خلال خاصية القصص القصيرة عبر حسابها الرسمي على موقع تبادل الصور والفيدوهات على "إنستجرام": "موضوع عيد ميلادي في بهية، في ناس متخيلين أنها فكرة طقت في دماغي وبعملها على سبيل اللذاذة، ميعرفوش أن الموضوع ده مهم وفارق معايا أوي، ومخلصة النية بشكل مش معقول".

أضافت: "الناس فكراني بهزر.. لكن أي حد هيجيب هدية ليا مش عايزاها ومش هاخد حاجة.. ولا عايزة أخرج ولا حد يطفي لي شمعة".

أكدت: "أي حد هيجيب لي حاجة، هو هياخد ثواب عظيم أوي، أتمنى كلنا نبقى مهيئين والموضوع ده يبقى جوه قلبنا، إحنا بنعمل خير.. في واحدة بتتألم حالا وواقفة مستنية دورها اللي ممكن يكون بيتأخر بسبب قلة الفلوس.. عايزين ندخل أكتر من واحدة مع بعض".

تابعت: "زي ما بنتجمع دايما وبنصرف قد كده عزومات وخروجات وأكل وبننبسط.. الفكرة دي مش لـ"البروبجاندا".. لو مكنتش قولت في العلن مكنش حد هيبعت الخمسة والعشرة جنيه اللي جمعت رقم كبير جدا".

ووجهت رسالة لمن يرغب في شراء هدية لها قائلة: "عايزاكي تترجمي أي حاجة هتجيبها لي صغيرة أو كبيرة لمبلغ هنعالج بيه واحدة.. هي محتاجاه وتبقى دي هديتي.. أنا عايزة الهدية تتكتب لي، والفلوس دي تتحسب لي".

يذكر أن الإعلامية دعاء فاروق، أعلنت عن احتفالها بعيد ميلادها الـ 50 هذا العام بطريقة مختلفة، موضحة أنها ستحتفل في بهية بالشيخ زايد، مطالبة ممن سيعطي لها هدية أن يحولهم لبهية.

نشرت "فاروق" عبر حسابها على موقع تبادل الصور والفيديوهات "إنستجرام" فيديو مجمع لها من سنوات حياتها المختلفة معلقة عليه: "عيد ميلادى الخمسين، خمسين سنة في رضا ونعم لا تعد ولا تحصى ألف حمد وشكر، يوم 10/10 هعمل عيد ميلادي في بهية زايد، وهعزم كل أصحابي الإعلاميين الكبار والأصدقاء والأهل والعيلة وعلى رأسهم جيجي أمي حبيبتي ربنا يبارك في عمرها يا رب".

أكملت: "ولأول مرة هطلب منهم هدية عيد ميلادي المبلغ اللي كده كده واللي كل سنة بيجيبولي بيه هدية عاوزاهم يجيبوه اليوم ده ويحطوه في بهية، وأي حد مش هيقدر ييجي بطلب منه لأول مرة يحول الفلوس دي لحساب بهية مش مهم الرقم كام المهم هديتي توصل".

أكدت "دعاء" على أنها تواصلت مع المسئولين بالمستشفى وطلبت منهم ذلك مكملة: "أنا اللي اتصلت بالمسئولين في بهية وطلبت منهم إنهم يسمحولي أعمل عيد ميلادي عندهم وأستقبل أصحابي وأستقبل الهدايا يوم 10/10".

أردفت: "فيه كمان حاجة مهمة قوي حابة أقولها لحبايبي الستات اللي بتتابعني من كل مكان ومن كل بلد في مصر أو في العالم واللي فيه كتير منهم بييجوا المعارض وكتير منهم بيجيبولي هدايا في المعارض وبنقعد نناكف مع بعض لما بقولهم ممنوع الهدايا وبرفض بحب شديد إني أخد من أي حد أي هدية، المرة دى بقى أنا هقبل الهدية، وأي ست عاوزة تهاديني في عيد ميلادي الخمسين تحول لحساب بهية أي مبلغ وتبعت لي صورة التحويل على الرسايل في فيس بووك أو إنستجرام أو تجيلي المعرض ومعاها الوصل اللي دفعت بيه في بهية عشان يوم 15 أكتوبر، وهو يوم عيد ميلادي الفعلي هنعد الهدايا اللي وصلت لي من كل مكان وهبلغكم بالمبلغ التوتال اللي دخل بهية وصل لكام".