مي فاروق: المسرح هو أكتر مكان بحس فيه بالسعادة

قالت الفنانة مي فاروق، إنها لم ترى نفسها في مكان غير المسرح، موضحة أن المسرح هو أكثر مكان تشعر بالسعادة فيه.

أضافت “فاروق” خلال لقائها في برنامج “أنغام” المذاع عبر شاشة “dmc”: “أنا حسيت أنه مينفعش أقف غير على المسرح، ده أكتر مكان أنا فرحانة وأنا موجودة فيه وأكتر مكان يليق لي، معرفش أعمل حاجة تانية غير دي”.

نرشح لك: كان هيغمى عليا.. لطيفة تتحدث عن أول لقاء لها مع بليغ حمدي

أشارت: “أكتر مكان بحس فيه بمعنى السعادة هو المسرح، ولحد دلوقتي عندي رهبة وتوتر وخوف من المسرح، وببقى مخضوضة وخايفة ومترددة، واللي حواليا مش مقتنعين إني  لحد دلوقتي بخاف”.

أما عن اختيار أغانيها قالت “فاروق”: “بختار اللي يليق لي وأحسه، الكلمة اللي أحس أنها حلوة أو هتليق عليا لو قلت كده، اللحن اللي محسوش غريب عليا، وأبقى مبسوطة وأنا بغنيه، مش أي حاجة طالعة جديدة أجرب أعملها”.

في سياق آخر، قالت الفنانة مي فاروق، إنها كانت تغني في دار الأوبرا المصرية منذ أن كانت تبلغ من العمر 8 سنوات، موضحة أنه لا يوجد أسباب محددة لاستقالتها.

أضافت “فاروق” خلال لقائها في برنامج “معكم منى الشاذلي” المذاع عبر شاشة “CBC” وتقدمه الإعلامية منى الشاذلي: “مفيش أي سبب هو بس أنا مش موظفة، أنا بحب المكان ده جدا واتربيت فيه وعشت فيه سنين كتير أوي، وكنت حاسة فكرة إني موظفة دي مقيداني في شوية حاجات، لكن دار الأوبرا لما بيطلبوني في أي حفلة بروح”.

أشارت: “فكرة إننا موظفة ده ملوش علاقة إني تابعة للمكان بس، أنا ببقى على قيد العمل في الحكومة، موظفة في الحكومة لكن مش ملزمة إني أكون بس في دار الأوبرا ولو استقالتي مش هتشتغلي في دار الأوبرا، هي ملهاش علاقة بالموضوع، وهو مش زعل، لكن فكرة إني موظفة جوا المكان مخلياني مضمونة طول الوقت”.

أوضحت: “أنتي بنتنا فهنيجي عليكي، حسيت أن ده مضايقني، وحبيت إني أرفع عنهم الحرج ده ولو قالوا لي تعالي هروح ده مكاني وبيتي.. ناس كتير بتسألني في حفلاتك في مصر أو الأوبرا أنا مبطلبش في حفلات في الأوبرا هبقى موجودة الناس فاكرة أن أنا اللي مقصرة أو أن أنا اللي مش عايزة أعمل حفلات في مصر بالعكس، أنا أول بلد عايزة أعمل فيها حفلات مصر”.

أردفت: “داخلين في سنة وست شهور مفيش دعوة واحدة جات لي أعمل حفلة في دار الأوبرا، إذا أتعرض عليا أنا موجودة، وده مش مزعلني، ده بيتي ومكاني من صغري، وأنا عمري ما هتبرأ منه، وبحبه وفي أي وقت أنا موجودة للأوبرا وجمهور الأوبرا”.