أحمد موسى: الحمد لله على نعمة الأمن.. ومحدش يقولي سعر الذهب بكام!
أكد الإعلامي أحمد موسى، أن مصر تنعم بالأمن والأمان بفضل المولى سبحانه وتعالى وقواتها المسلحة العظيمة، قائلا: “كل واحد يرفع إيده ويحمد ربنا ويشكر فضله على نعمة الأمن، النعمة دي لا تقدر بأموال الدنيا ولا كنوزها”.
تابع “موسى” خلال برنامج “على مسئوليتي“، المذاع على قناة “صدى البلد”: “مفيش حد يقولي سعر الذهب بكام والجرام بكام، كلمني أنا قاعد فين وأخبارها إيه، تقولى ذهب مين، دول باعوا الذهب اللي عندهم علشان يعرفوا يوصلوا مصر وهل سألوا بكام ذهب، إحنا بنتكلم في فراغ وهوا، وناس قاعدة في تكييف، واللى جاي من السودان، لا عارف ينام إزاي، بيفطر إزاي، بيتسحر ولا لاء، في أكل ولا لاء، هل سأل ثمن كيلو الأرز بكام”.
أضاف أن كل تفكير العائدين من السودان، كان هو الوصول إلى بلدهم ووطنهم، مردفا: “ربنا يحمي جيشنا العظيم، عايزك لما تشوف أي حد من القوات المسلحة بوسه، قوله متشكرين، علشان عارف تتحرك في بلدك، وتعمل كل شيء، لما روحت ميناء أرقين، علشان نسجل مع العائدين من السودان، كنت حريص أووي، مش مهم التعب، لازم أشوف الناس دي وأروح ليهم وتشوف اللى حصل، ويسوى كام، وكمان الشعب السوداني الشقيق، ده شعب وناس مسالمة فجأة، حصل اللى حصل، وحصلت الحرب، يعملوا إيه الولاد دول والأطفال والستات”.
كما وجه التحية إلى الفريق كامل الوزير، وزير النقل، لتوفيره لفريق عمل برنامج “على مسئوليتي”، سهولة الحركة في ميناء أرقين واستقبال العائدين من السودان والتسجيل معهم، كما وجه التحية لوزير الداخلية، وذلك لسهولة التنقل ونقل ما يدور من خراب وتدمير ومعرفة قصص وحكايات الناس التي عادت من السودان.
استكمل: “تخطينا مسافة الـ 1500 كيلو، علشان نشوف أهلنا وهم راجعين من السودان، ولازم نحمد ربنا ونشكر الرئيس السيسي، الرجل الذي قرر مبكرا وقال استعدوا”.
استطرد: “مصر في نعمة كبيرة من الأمن والأمان ده بفضل ربنا والجيش، علشان كده بقولك لما تشوف أي حد من الجيش بوسه واحضنه، الناس كانت عايزة حاجة واحدة بس هي الوصول إلى مصر، مكناش التفكير في أي شيء تاني غير العودة إلى مصر، شوفوا قعدوا كام يوم في الطريق لحد ما يرجعوا مصر”.
كما أكد أن الرئيس عبد الفتاح السيسي، يتابع على مدار الساعة عمليات إجلاء المصريين من السودان، مشيرا إلى أنه تم إجلاء أكثر من 6 آلاف من السودان حتى هذه اللحظة، قائلا: “دخل مصر مواطنين من 47 جنسية في عمليات الإجلاء اللى من أمريكا والصين وفرنسا والهند وتونس وبريطانيا، إحنا أكبر بلد دخل عندها جنسيات، في برقيات شكر وجهت لمصر بسبب عمليات إجلاء المواطنين من الدول الأخرى”.