خالد الجندي: أصحاب الخطاب الديني بيتراجعوا خوفًا من السوشيال ميديا

إسراء حسن

علق الشيخ خالد الجندي، عضو المجلس الأعلى للشئون الإسلامية، على كلمة الرئيس عبد الفتاح السيسي اليوم الثلاثاء، في خطاب المؤتمر الاقتصادي وحديثه عن الطلاق الشفوي.

قال “الجندي” في تعليق له خلال برنامجه “لعلهم يفقهون” والذي يعرض على شاشة “dmc” اليوم الثلاثاء: “الرئيس نفسه اتكلم في القضية الخطيرة وهي قضية الطلاق الشفوي اللي أنا بنادي بيها بقالي 9 سنوات، الرئيس قال إنه لما اقترح وثيقة الطلاق الشفوي، علماء الدين انقسموا إلى قسمين؛ قسم وافق وقال إنها توافق الشريعة؛ والقسم الثاني تحفظ”.

نرشح لك: خالد الجندي عن الرئيس “السيسي”: رئيسك بيخاف من الله

أضاف: “وحين سألهم عن سبب التحفظ قالوا أصل مش عايزين يتقال.. لمحت مرارة في حديث الرئيس، لما رجل الدين يتوخى الحذر من حديث الناس، ولو عملت حساب للقيل والقال مش هتعرف تتكلم، وهتكتشف في النهاية إن اللي بيحركك في الآخر شوية عيال على السوشيال ميديا بيتهموك أو يشتموك”.

تابع: “بيحصل إرهاب للضعفاء من أصحاب الخطاب الديني بيرجعوا خطوتين لورا خوفاً من هجوم بعض العيال عليهم، ودا كلام خطير جداً، لذلك أنا بسميهم شيوخ منتصف العصا، لا أنت عارف دا هنا ولا هنا، حاجة جيلاتينية لزجة، متاخدش منه عقاد نافع”.

استكمل: “مشكلة الطلاق الشفوي دي اللي بيتكلم فيها السيد الرئيس، كل دول العالم خلصت منها ما عدا مصر ودولة تانية، المملكة العربية السعودية ألغت الطلاق الشفوي والغيابي ومحدش يقدر يزايد على المملكة في الدين، ليه إحنا بنزايد على بعضينا، وزير العدل النهاردة قال إنه منطقي جداً إن زي ما الزواج كان بوثيقة يبقى الطلاق كمان بوثيقة”.

اختتم: “أنا مش هنسى الإحصائية اللي قالها سماحة المفتي، قال إحنا بتتعرض علينا 30 ألف قضية طلاق، ولما بننقاشهم بنلاقي إن النسبة الفعلية لحالات الطلاق منهم 3 حالات فقط، فالحكم في الشرع يكون على الأغلب ليس على الأقل”.