لميس الحديدي تنتقد زيادة نسب الولادة القيصرية

قالت الإعلامية لميس الحديدي، إن مصر واحدة من أعلى الدول في العالم في معدلات الولادة القيصرية أن لم تكن أعلى دولة، موضحة أن الولادة في العالم أجمع هي الولادة الطبيعية، ولا يوجد تدخل قيصري إلا في الحالات الحرجة.

أضافت “الحديدي” خلال حلقة اليوم من برنامج “كلمة أخيرة” المذاع عبر شاشة ON”، أن 72% من الولادات في مصر ولادة قيصرية، لافتة إلى أن نسب الزيادة ترتفع في الحضر عن الريف، موضحة: “69% من الولادة في الريف ولادة قيصرية، إحنا طول عمرنا عارفين أن الست في الريف بتولد ولادة طبيعية”.

نرشح لك: لميس الحديدي: المجتمع محتاج يتعلم احترام المرأة

أوضحت: “ده كان زمان بتروح الغيط تولد، أنتوا مش فاكرين الأفلام، كانت أفلام شهيرة جدا الست بتولد إزاي والداية، دلوقتي كل ده أتغير وأمام أرقام مرعبة.. ووزير الصحة قال لا بد من وجود إجراءات مشددة، وأجر الطبيب في الولادة الطبيعية هيتساوى بأجر الولادة القيصرية، عشان الدكاترة ميستسهلوش”.

أشارت: “من الواضح أن في بعض الاستسهال، الدكتور بيستسهل أنه يولد ولادة قيصرية، لأن تكلفتها أعلى، ولأنها محددة بوقت هو عارف أنه هيولدها يوم كذا الساعة كذا، فبيروح العيادة ومعندوش واحدة هتكلمه الساعة 2 بليل تقول له يا دكتور أنا بولد”.

أردفت: “في كلام أن كفاءة الدكتور بتقل لعدم ممارسة الولادة الطبيعية وبتزيد مع الولادة القيصرية، فالكفاءة في الأمور الحرجة بتنخفض أيضا بشكل كبير، بالإضافة لفكرة مش عايزة اتعرض للألم واتبهدل، زي ما شوفنا في فيلم (الحفيد) ألم ميرفت أمين وهي بتولد فكثير من النساء قالت أنا عايزة أروح أجيب البيبي وأرجع بدون مشكلة”.