استقالة هاني شاكر من منصب نقيب المهن الموسيقية

أعلن الفنان هاني شاكر استقالته من منصبه كنقيب للمهن الموسيقية، مشيرا إلى أنه لا يريد التحدث في تفاصيل، موضحا ما حدث من مشادات خلال مؤتمر اليوم للفنان حسن شاكوش بالنقابة.

أوضح “شاكر” خلال مداخلة هاتفية مع برنامج “الحكاية” الذي يقدمه الإعلامي عمرو أديب على شاشة MBC مصر: “إحنا خدنا قرار المؤتمر النهاردة بسرعة شديدة جدا نتيجة لظروفي وظروف الأساتذة عازفين الإيقاع علشان نحل المشكلة لكن مش علشان نتخانق”.

نرشح لك: هاني شاكر: استقالتي من نقابة المهن الموسيقية بلا رجعة

 

تابع: “علشان نحط النقط فوق الحروف والأسرة الموسيقية تفضل متلاحمة ومتكاتفة وأسرة بجد كلنا بنقدر بعض وبنحب بعض، وفعلا تم المؤتمر في البداية وجه الفنان حسن شاكوش واعتذر للناس، اعتذر للنقابة تاني واعتذر للنقيب والجمهور في كل مكان واعتذر لشعبة الإيقاع”.

واصل: “وانتهى المؤتمر على كده وأنا كنت تقريبا قايم، حصل مشادات الحقيقة أنا مكنتش أحب أنها تحصل من الأساس، وخلاص أنا سيبت المكان ومشيت، أنا في الحقيقة ربنا شاهد عليا إن أنا من أول يوم قعدت على هذا الكرسي لحد النهاردة أنا مراعي ربنا في الجمعية العمومية أنا وزملائي ومراعي ربنا في الأعضاء والحمد لله اتنقلنا بيهم نقلة تانية خالص والكل يشهد بهذا، لكن أنا الحقيقة بعلن بعد هذه الرحلة اللي قضيتها في نقابة المهن الموسيقية وجلوسي على هذا الكرسي المحترم الجميل اللي بيتشرف بيه كل فنان، أنا بقدم استقالتي”.

استكمل: “نقدر نقول إن القرار بسبب المؤتمر، أنا مش عايز اتكلم في تفاصيل أنا بقدم استقالتي من نقابة المهن الموسيقية وبشكر كل الناس اللي اتعاملت معاهم”.