عمرو محمود ياسين يعلن انتهاء تصوير "نصيبي وقسمتك 4"

يوسف الشريف

أعلن المؤلف عمرو محمود ياسين، انتهاء كتابة وتصوير وإخراج الجزء الرابع من مسلسل “نصيبي وقسمتك”.

وكتب “ياسين” عبر صفحته الشخصية على موقع التواصل الاجتماعي “فيس بوك” الآتي: “فركش أخيرا مسلسل نصيبي وقسمتك ٤.. بأمانه شديدة احنا كان معانا وحوش مش كرو، بجميع الأقسام من إنتاج، إخراج، تصوير وإضاءة، مونتاج صوت، ومكساج، ديكور، ملابس، مكياج، بوفيه، سواقين، وطبعا كمان الممثلين بكل حكاية، بصراحة كانوا بييجوا نعذبهم والضحايا كتير”.

نرشح لك: عمرو سعد عن “الجسر”: مضيت من غير ما اقرأ بسبب اسم بيتر ميمي

تابع: “بس الناس لازم تعرف إن كل الحكايات اتكتبت ع الهوا اتصورت على الهوا، اتمنتجت على الهوا، في سباق رهيب مع الزمن لم أراه من قبل، شيء محدش يقدر يتخيله، بجد اللي حصل في المسلسل ده محدش يتخيله لأننا اضطرينا نشتغل في توقيت معين واخدنا الريسك، فنأسف لو في أي تقصير من أي حد فينا”.

أضاف: “أنا عايز أشكر كل الناس فرد فرد لأن كلهم كانوا أبطال وبيشتغلوا بـ ٣٠ ساعه وأكتر، بس أحب أشير للدايرة القريبة مني في الشغلانة اللي هما كانوا أكبر عون لي وكنت بتعامل معاهم طول الوقت، وهم المنتج المحترم وصديقي أحمد عبد العاطي، شريك الرحلة اللي بنشيل الهم سوا، المخرج المنفذ أحمد عمر اللي بينيمني ويصحيني على مزاجه ويرسم لي الطريق أعمل ايه ومعملش ايه، المشرف العام على الإنتاج ماجد جاب الله، المنتج الفني أيمن شوقي ومدير إدارة الإنتاج وليد الحسيني اللي دايما بيطمني انه كله تمام حتي لو مش كله تمام بس بيعالجني نفسيا، و مدير الإنتاج أيمن عباس وجميع أفراد طاقم الإنتاج، مهندس الديكور رمسيس سليم ومهندس محمد المغازي اللي فجأة بطلب منهم تغيير أوضة نوم لقسم شرطه عادي، وباقي أفراد قسم الديكور الرائعين، منسقين مناظر هاني سلطان وسامي حميدة”.

في نفس السياق، تابع: “ستايلست حسن مصطفى اللي بياخد البريف لاست مينت وبيسد عادي و جميع مساعديه، مصمم صوت ومكساج العالمي م علي السعيد، مهندس الصوت محمد زكريا ومساعديه، واسيست محمود، المونتيره المتمكنه جدا منه جاب الله، وآية عبد العزيز ومصطفى عماد، ويوسف عادل اللي صمم هذه الأفيشات الرائعة، بروموهات وليد أبو العنين، وبوبا دياب ميكاب ارتيست وجميع مساعديها، وكوافير إسماعيل الإسكندراني إكسسوار هاني جمال بوست برودكشن خليفة السيد، وطاقم الإخراج الرائع (الوحوش) بجد وحوش مساعد أول مصطفى الجمال، وضياء سيف ومي وائل ومأمون شديد واسلام ناصر، بجد ليهم ألف تحية عمود العمل دول، وجميع من عمل بالإخراج، مدير التصوير المتميز هيثم ناصر والمخضرم عماد عثمان وحسن زيدان ومحمد شديد وجميع طاقم التصوير، وكاستنج دايركتور محمد حجاج ، طبعا الأسماء دي مش بذكرها مش عشان هي الأهم بقدر ما أن دول الناس اللي كنت بتعامل معاهم طول الوقت بشكل مباشر”.

اختتم: “وأخيرا وليس أخرا المخرجين الرائعين، الاستاذ عصام نصار، الأستاذ محمد الخبيري. والأستاذ رامي رزق الله، اللي قدروا يقدموا حكايات جميلة في ظروف صعبة جدا سكريبت مش خلصان لكن كانوا في ضهري وقدموا شغل رائع، كل التحية لهم والتقدير والف شكر للجمهور الرائع ع الدعم والمساندة”.