سلوى عثمان: لولا ظروف عملي في التمثيل لكفلت طفل يتيم

يارا سامي
سلوى عثمان
كشفت الفنانة سلوى عثمان عن تفاصيل مشاركتها في “حكاية مريم” بمسلسل “زي القمر”، موضحة أن الدور أعجبها جدا لأنه إنساني.

أضافت “عثمان”خلال لقائها ببرنامج “الستات مايعرفوش يكدبوا” مع الإعلامية منى عبد الغني والإعلامية هبة الأباصيري والإعلامية إيمان عز الدين، المذاع عبر قناة “CBC”، أن فكرة كفالة اليتيم وليس التبني لا تشترط أن يكون الشخص غني، لأن بداخل المسلسل أشخاص أغنياء ولكنهم رفضوا الفكرة.

نرشح لك: فرح الزاهد عن “بينا اتفاق”: اتخضيت من البطولة.. وشخصية “مي” تشبهني

تابعت: “فيه أب ميسور الحال ورفض أنه يربي الطفلة، فجت في الآخر الست البسيطة اللي هي بتشتغل مشرفة في دار الأيتام بتحب البنت جدا ومتجوزتش فاعتبرت أن البنت دي بنتها، المشرفة بتقول حست إنها بنتها خصوصا إنها مش مخلفة بسبب إن عندها السكر فشافت حياتها في البنت الصغيرة دي، فطبعا ده موقف إنساني جميل أوي صعب تقولي لا معملوش لا ده أنا لازم أعمله”.

وعن رأيها في ريم عبد القادر التي جسدت الشخصية، قالت: “أنا حبيتها جدا لأنها ممثلة شاطرة وحساسة وكنت حاسه وقت العمل أنها بنتي”

وعن إمكانية كفالتها طفل، قالت: “أنا أساسا معنديش أولاد، بس أنا الحياة بتاعتي صعب شوية إني يكون عندي طفل، بس لو كانت حياتي مختلفة عن إني بمثل وبنزل للشغل، الطفل ده بيحتاج رعاية واهتمام لكن أنا بنزل اروح شغلي وبنزل بدري أوي وأوقات برجع متأخرة مش هكون قادرة كسلوى، لكن كست ممكن تكون طريقة حياتها مختلفة عن حياتي كنت هبقى عايزة يبقى معايا طفل ممكن أكفله”.

تابعت: “بدليل أننا في الحدوتة فيه أهل عندهم ولد وبنت كانوا عاوزين مريم، فلم يقتصر الطفل على الغير قادر على الإنجاب، في الحدوتة اللي كان عامل دور حسام أنه مش عاوز البنت ولما جاتله البنت ربنا خلى مراته تبقي حامل قالها خلاص ملوش لزمه وجودها، وبمجرد ما البنت خرجت من البيت مراته الحمل بتاعها راح فالرسالة هنا إن ممكن ربنا يباركلك ويكرمك علشان اليتيم اللي أنت بتكفله”.

اختتمت: “أنا اشجع أن أي حد يكفل طفل يتيم ويكون سبب سعادة له وكرم من ربنا”.

يذكر أن مسلسل زي القمر “حدتة مريم” من بطولة الطفلة ريم عبد القادر، والفنانة رشا مهدي، الفنان إسلام حافظ، والفنانة هاجر الشرنوبى، ومن إنتاج مها سليم، وإخراج معتز حسام.