عمرو أديب عن "فوتوسيشن" محمد رمضان في مرفأ بيروت: ليه بيعمل كده

محمد رمضان في مرفأ بيروت

علق الإعلامي عمرو أديب على ذهاب الفنان محمد رمضان للتصوير في منطقة انفجار مرفأ بيروت التي وقعت قبل عام، وسبب أزمة كبيرة في لبنان وراح ضحيتها عدد كبير من الضحايا والمصابين.

قال “أديب” خلال برنامج “الحكاية” المذاع على شاشة mbc مصر، خلال حلقة أمس الجمعة، ساخرا: “الأستاذ الدكتور محمد رمضان راح وقف اتصور في مرفأ بيروت، أنتوا عارفين طبعا المرفأ ده مات بسببه 200 لبناني والحياة انتهت في لبنان”.

نرشح لك: عمرو أديب: تحية للي خطط ونفذ عملية إجلاء المصريين في كابول

تابع: “قرر إن هو يعمل فوتوسيشن هناك، ماشي، قال يعني بيتضامن، راح واخد الفوتوسيشن دي ومركب عليها أغنية من بتوعه، وكأنه هذا الموقع يصلح إنه يتعمل فيه فيديو كليب، حتى كل اللبنانيين بعتوله قالوله أنت ملقتش غير المكان اللي مات فيه الناس؟”.

استكمل: “هو بيعمل إيه؟ هو ليه بيعمل كده؟ وهو فاكر إن العالم مثلا مقفول أو محدش هيشوف، محدش هيعرف، محدش هيسمع، وإن نقابة الممثلين شمال طرابلس هي تبقى برضو النقابة بتاعة لبنان كلها، وإن ده وزير الثقافة ومحدش هيقول حاجة، وإن الراجل بتاع المركز الألماني إنه يطلع بتاع ألمانيا وهو ملوش علاقة بألمانيا خالص”.

أردف: “هو فاكر إن محدش هيعرف؟ هو اللي زاد وغطى في النهاية اللي عمله ده، وقفته في المكان اللي الناس ماتت فيه ويروح حاطط عليه أغنية، فاللبنانيين طبعا تعبوا بقى زهقوا من اللي بيجرى ده، هو عايز إيه؟ بيعمل إيه؟ محدش عارف بصراحة”.

يذكر أن عدد من اللبنانين عبر موقع التدوينات القصيرة “تويتر”، هاجم محمد رمضان ووزارة الثقافة اللبنانية وكل الجهات التي سمحت له بالتصوير في موقع انفجار مرفأ بيروت، خاصة ما اعتبروه أنها “فوتوسيشن” على حساب الضحايا والآلام التي عاشوها في الحادث، فيظهر “رمضان” في الصور وهو يقف شامخا وينظر من خلفه لبقايا الانفجار.

محمد رمضان في مرفأ بيروت