دعاء فاروق: ليس لي علاقة بأي شيوخ بتفك السحر
شاركت الإعلامية دعاء فاروق، الجمهور بمنشور نفت من خلاله علاقتها بأي شيوخ أو أشخاص تدعي فك السحر أو تمارس أعمال الشعوذة والدجل.
كتبت “فاروق” في المنشور الذي طرحته عبر صفحتها الرسمية على موقع “فيس بوك” الآتي: “رجاء، من فضلكم، أنا ليس لي أي علاقة بأي شيوخ بتفك سحر أو بتعمل سحر أو بتعمل جلب حبيب أو طرد عفاريت، دي أعمال كفر ونصب ومعنديش أرقام أي حد”.
نرشح لك: السن الأكثر عرضة لـ إدمان المخدرات
تابعت: “مش معقول مكالمة تليفون جت لي في البرنامج من سيدة حكت قصة عن السحر تخلي كمية من الستات تجيب رقمي وتكلمني يوميا، سيل من المكالمات والرسايل تطلب مني رقم الشيخ اللي فك السحر للست اللي اتصلت بيا من سنتين، لا أعرفها ولا معايا أرقام أي حد واللي متعلق بقشاية رجاء أنا مش هفيدكم، دي أعمال كفر وأنا مش هفيد حد فيها نهائي”.
الإعلامية دعاء فاروق
يشار إلى أن دعاء فاروق، كانت قد طرحت منشور علقت من خلاله على إعجاب الجمهور بالأغاني التي غناها الفنان حسين الجسمي في إعلانات الموسم الرمضاني الحالي، وكتبت عبر صفحتها الرسمية على موقع “فيس بوك” الآتي: “نحب نسأل الفنان حسين الجسمي عن سر الدعاء اللي الست الوالدة دعتهوله عشان مصر كلها طول شهر رمضان تصحي تقول رمضان في مصر حاجة تانية والسر في التفاصيل؟ وتختم بسر السعادة في بيتك تعالي.. نحب نعرف سر الدعاء بعد إذنك؟”.
انهالت التعليقات منتقدة إياها، إذ أبدى عدد من المتابعين استيائهم من موقفها تجاه الاستماع للموسيقى، التي حرمها البعض.
لترد عليهم كاتبة: “عشان نقفل الموضوع ده يا جماعة ريحوا نفسكم أنا قناعتي كده، ومقتنعة بأي دار الإفتاء المصرية الخاص بالموسيقى تمام الاقتناع معرفش أنا قناعة الناس اللي بيقولوا حتي لو بنسمع موسيقى بس هي حرام، يا جماعة اللي شايف إن الموسيقى حرام وبيسمعها يبقى يحاسب نفسه هو الأول، اللي داخلة بتحاسبني إني بتكلم علي أغاني حسين الجسمي وشايفة إني عملت جرم فظيع، هي تعرف حسين الجسمي ليه أساسا وهي شايفة إن الموسيقى حرام المفروض متسمعهوش أصلا ولا تعرف اسمه”.
تابعت: “أنا قناعتي ماشية مع تصرفاتي وأعلنها على الملأ ومعنديش حاجة اسمها حرام بس بعملها، انا ماشية برأي دار الإفتاء المصرية اللي بيقول ان الموسيقى مجرد صوت، وليها استخدامات عديدة وشايفة إن في عصرنا الموسيقي داخلة في كل شيء، برامجي الدينية تبدأ بموسيقى وتنتهي بموسيقى، الموسيقى الشهيرة لبرنامج الشيخ الشعراوي كانت بتجمعنا كلنا لسنوات كل يوم جمعة ولسه نغمتها في وداني وعمري ما هنساها، وهي أداة تعريف للبرنامج اصلا، بتعرفي إن البرنامج جه من موسيقته، أنا قناعتي كده، واللي شايف إن الموسيقي حرام طبعا وداخل يحاسبنا لا حضراتكم بيعوا التلفزيون والراديو عشان بمنطقكم انتو بتعملوا الحرام كل يوم كده”.
استطرت: “وقفوا الحرام بتاعكم وخليكم أقويا كده وعندكم عزيمة واقفلوا أي حاجة بتطلع صوت، ومتحاسبوش حد غير نفسكم، شكرا”.
فيما أضافت: “يا رب انت شاهد وشايف، الناس المتدينين المحترمين الخلوقين اللي العيبة مبتطلعش منهم داخلين ينعتوني بالنفاق ويشتموا في دار الإفتاء ويشتموا في الشيوخ ويشتموا في أي رأي مخالف، يا رب انت شاهد، اللهم انت حسبي لا إله إلا انت، حسبنا الله ونعم الوكيل، امشوا من صفحتي بقي سيبوني في حالي حسبنا الله ونعم الوكيل حسبنا الله ونعم الوكيل”.