تامر أمين لحلا شيحة بعد ظهورها بطرحة في كتب كتابها: احترنا معاكي

علق الإعلامي تامر أمين على زواج الداعية معز مسعود من الفنانة حلا شيحة، وقال إنه لديه عدة ملاحظات على هذا الأمر، مضيفا أنه يبارك لهما على زواجهما.

تابع “أمين” خلال حلقة الأربعاء من برنامج “آخر النهار” المذاع على شاشة النهار: “أي جواز في الحلال أي ارتباط في النور لازم نبقى فرحانين بيه كلنا، مركزين في الجملة اللي أنا قولتها؟ يا جدعان يا بتوع السوشيال ميديا يا ناس يا بتوع بير السلم، أي زواج في النور دي حاجة تفرحنا ولا حاجة تخلينا نثرثر ونهري ونشوه ونبوظ؟ بيتهيألي المفروض نبقى فرحانين، المفروض نفرح للناس في الخير مش في الشر”.

نرشح لك: تامر أمين عن شائعة ارتباط غادة عادل وشاكوش: كده بنمس أعراض

استكمل: “فالعلاقة المحترمة اللي في النور اللي تنتهي بعقد قرآن لازم كلنا نفرحلها، علشان كده أول ملاحظة مليون مبروك لمعز وحلا”.

أردف أن ثاني ملاحظة أنه يعرف أن كواليس حياة الشخصيات العامة دائما مثيرة ومادة خصبة للمعجبين والجمهور، مضيفا: “بس دايما خليكوا في اللي يستحق، أنتم شايفين إن ده يستحق التشويه؟ الحملة السخيفة اللي اتعملت على السوشيال ميديا ضد حلا ومعز أنا في رأيي مش صح”.

تابع: “قالك فيما معناه يعني إن الناس كانت عايزة تقول على معز إنه بتاع ستات وإنه بيوقع كل واقعة وواقعة عاملة ازاي، هو بيعمل حاجة غلط الراجل؟ يعني بتاع ستات دي أومال أنتم عايزين الراجل يبقى بتاع إيه؟ موتوسيكلات، ما لازم يكون الراجل بتاع ستات، بس الفرق بقى بين الراجل المحترم واللي مش محترم، إن الراجل المحترم بتاع ستات في النور وعلى سنة الله ورسوله، وفيه راجل بتاع ستات برة النور وبرة أي علاقة شرعية”.

أضاف: “فالراجل بيتجوز، بيتجوز بقى ستات حلوين الله يسهله يا أخي، أنت هتبصله في مراته؟ دي حاجة غريبة جدا، فأنا بقولكم أهو كل واحد يخليه في نفسه وكل واحد يخليه في مراته واللي ربنا قسمهوله ورزقهوله يرضى بيه، كل واحد حر هي حرة وهو حر في قراراتهم طالما نيتهم خير”.

ومن جانبه، وجه تامر أمين سؤالا إلى حلا شيحة، وقال: “أنتي حيرتينا معاكي يا حلا، كنتي ممثلة ومن غير حجاب وبعدين اتحجبتي وبعدين اتنقبتي وبعدين قلعتي النقاب وبعدين قلعتي الحجاب ورجعتي للتمثيل وبعدين دلوقتي حاطة طرحة على شعرك في كتب الكتاب، فأيه؟ أنا ماليش إن أنا أتدخل في قراراتك وفي حياتك، أنا بس اللي بسأله إيه؟ يعني اثبتي على حال علشان نعرفك بيه، يا محجبة يا مش محجبة يا منقبة يا معتزلة يا ممثلة، يعني قوليلنا بس أنا إيه علشان إحنا احترنا معاكي، وأنتي حرة في قراراتك خصوصا فيما يتعلق بعلاقتك بربنا، إحنا بس عايزين نعرف الوضع الذي ستستقرين عليه فقط”.