15 تصريحًا لـ سمير غانم.. أبرزها عن رسوبه بكلية الشرطة
هدير عبد المنعم
حل الفنان سمير غانم ضيفا على برنامج “السيرة” المذاع على شاشتي “dmc” و “أبو ظبي” وتقدمه الإعلامية وفاء الكيلاني، وتحدث “غانم” خلال الحلقة عن طفولته وشبابه وبداياته الفنية.
يرصد “إعلام دوت كوم” أبرز تصريحاته خلال الحلقة:
نرشح لك: سمير غانم: والدي كان ضابطًا صارما في كل الأمور
1- كنت طفل مش شقي لكن عندي طموح.
2- كان مصروفنا على قدنا ومكناش بنهتم لأن كل حاجة كانت متوفرة.
3- أنا خجول جدا وعمري ما أعاكس واحدة، الوحيدة اللي لقيت نفسي عايز أكلمها مديحة كامل، لقيت واحدة ماشية وماسكة الكتب قلت لها أنا آسف بس أنتي قمر، قالت لي “ربنا يخليك”.
4- أيام الكلية، كنت أدرس في كلية الزراعة وكنا نذهب إلى كلية الحقوق حتى نرى زبيدة ثروت، “عبارة عن طاجن قشطة وسط الطلبة كده”.
5- الأنثى هى البهجة في حياة الرجال كلهم، الجمال يفعل شيء في حياة الرجل يشرح النفس.
6- سمير صبري تاريخ الفنانين والفنانات حتى ميلادهم عنده، سمير ما شاء الله مخ ذاكرة.
7- دمعتي قريبة بفظاعة بشكل إني ممكن اتكسف من نفسي.
8- أول صدمة في حياتي وفاة والدتي، ثم وفاة أخي، كانت مأساة وشعرت أني تائه من بعده.
9- والدتي دعت لي، وفي اليوم التالي حصلت على عمل في فيلمين، منهم فيلم “في الصيف لازم نحب”.
10- اكتشفت إني بحب التمثيل لما كنا بنتحبس أنا وكام زميل ليا في كلية الشرطة، فأنا كنت بقلد ضباط السرية، ومن ضمنهم صلاح ذو الفقار كان ضابط السرية عندي.
11- بدأت أمثل أثناء دراستي في كلية الزراعة، والدي زعل لما عرف، لكن لما اشتهرت كان هو بيرد على المعجبين، أنا كنت باخده معايا في كل حتة.
12- الضيف أحمد وشه لوحده يضحك، وجورج سيدهم يطلع يهز هزتين الناس تضحك، أنا شكلي مبيضحكش، كنت في حفلة في الأردن وكنت متضايق، الضيف أحمد قال لي: “أنت هتشوف استنى بس”.
13- عندما رسبت في كلية الشرطة أصابتني حالة سيئة جدا، ولم أذهب إلى المنزل وظللت أمشي على الكورنيش، الوالد بحث عني، وعندما عدت لم يقل لي أحد كلمة سيئة.
14- مجموعي وداني كلية الزراعة بجامعة الإسكندرية وكان فيها طاقات ومواهب فنية كتيرة، لدرجة إني كنت بعيد السنة علشان أقعد شوية تاني، لدرجة أن الدكتور كان يقولي تعالى بس أحضر الامتحان وهنجحك، أقول له لو فاضي هاجي.
15- كنت جعان وعندي امتحانات ومش معايا مليم اجيب سندوتش، وظابط في الكلية قابلني في سبورتنج قال لي مالك؟ قولت له جعان، قال لي طب خد واداني جزء من مرتبه، روحت داخل مطعم اسمه الحاتي السوري منسهوش أبدا.