تحليل

باسم يوسف يكتب: قول هااااااااااااح

الحقيقة أنا حزين وممتعض جدا بسبب إصرار تامر على أن يحاول أن يقدم إعلاما مستقل ومساحة للتفكير الحر.

ليه كده يا بني؟

ألم تتعلم ممن سبقوك؟ ألم تدرك بعد نوعية الإعلام المصرح به في أوطاننا؟

يصف تامر هذا الموقع بأنه “محاولة للتحررمن أي رقابة، والتحلل من أي قيد، والفكاك من كل سقف، والخلاص من كل شبهة”.

إيه يا عم حيلك. كده، بدون سقف، بدون رقابة، بدون قيد؟

كده؟

إيه نمشي احنا ملط في البلد دي وللا إيه؟

ألا تعرف أن الوقت غير مناسب؟ مناسب لإيه؟ مش عارف، بس هو مش مناسب وخلاص.

يقولون لنا إنه “مش وقته”. ربما يأتي وقته في نوفمبر ٢٠٢٥ أو يوم خميس، لا يهم، فلعقود مضت يقولون لك “مش وقته” ولا يقولون”طب امتى؟”.

الإجابة معروفة. لما البلد تستقر. مع أنهم يقولون لنا إن البلد خلاص استقرت.

عزيزي تامر هناك طرق أخرى لتقديم إعلام متميز ومقبول. إعلام يبني الوطن ولا يهدمه، إعلام يقف في ضهر الوطن كده ويسنده، ويحضنه و. و. ي…..

بص يا تامر

سيبك من الافكار الهدامة اللي في دماغك دي.

تعلم ممن سبقوك في الإعلام. اكتب مقالة تسب فيها معارضيك وتصفهم بالخونة.

ارسل رسائل حب ووله لبطلك المفضل وأعلن عن فاشيتك في كل مناسبة وكل “وضع”.

اكتب وهاجم وشوه، وحين تتحول السياسة العامة أو تجيلك الأوامر من فوق، “جيب ورا عادي”. اتهم دول وأشخاص بالخيانة ثم حين ترى ولي الامر على وفاق معهم  تعامل عادي كأنك ولا قلت حاجة قبل كده.

هو فيه حد بيفتكر؟ و افتكر، حد حيعمل حاجة؟

زعق وطبل، وبعدين اشتم اللي طبلت له، ثم طبل له تاني. ستبقى على الشاشة وسيتجاهل الناس الحقائق ما دمت تغطي عليها بالصراخ والصويت.

اخرج على جمهورك واطلق عليهم “زعابيب” جنونك. أغرقهم في مؤامرات عالمية، “زعق” في وشهم، ربيهم دول حبة مشاهدين لا راحوا و لا جم.

أو قول هااااح.

هذا هو الاعلام المطلوب، فتدبر.

وحين تفشل وتجد أن الناس انصرفت عنك، افتح “بكابورت” تاني.

سكة الفضائح كلها مكاسب يا أخي. جنس، شذوذ، زنا محارم، زنا مشكل، زنا بس.

أو يمكنك أن تدخل عالم آخر وتقتحم عالم الجن. وإن لم تجد حد ملبوس بالجن، البسه انت، والله حتنبسط.

كنت أريد أن أتمنى لك التوفيق في هذا المشروع البائس الذي لا طائل من ورائه إلا الإضرار بمصلحة الوطن يا خاين يا وحش.

كنت أعتزم أن أقوم بحمايتك من نفسك فأذهب للإبلاغ عنك والمطالبة بحبسك وتغريمك. لكن للأسف خايف يمسكوا فيا أنا، وأنا مش ناقص يا تامر يا أخويا.

جود لاك  يا تاااااااامر!!!!!

نقلًا عن موقع “تامر أبوعرب

اقرأ أيضًا:

حسام السكري: باسم يوسف ليس أفضل مذيعى 2014

‫باسم يوسف: مهلة الكفتة انتهت.. والاستهزاء بالمصريين مستمر

“متضامن مع باسم يوسف” أحدث هاشتاج على تويتر

“سيلفي” مع باسم يوسف

‬‎تابعونا عبر تويتر من هنا

تابعونا عبر الفيس بوك من هنا

كاتب

إعلام دوت كوم صوت الميديا العربية

أنت تستخدم إضافة Adblock

برجاء دعمنا عن طريق تعطيل إضافة Adblock