هالة فاخر: بعض رجال الدين كرهونا في الدين
انتقدت الفنانة هالة فاخر، تركيز بعض من رجال الدين في أحاديثهم التلفزيونية على العذاب الذي يتعرض له الإنسان في الآخرة، وتجنبهم الحديث عن الرحمة والمغفرة، مُضيفة: “الشعب المصري بكل طوائفه، مسلمين وأقباط، متدين بالفطرة، وبيحترم رجل الدين وبيديله مكانة خاصة، بس هل كل رجال الدين يستحقوا المكانة دي؟، بالتأكيد لأ”.
وتابعت “فاخر” خلال حلقة اليوم، الإثنين من برنامجها “انتبهوا أيها السادة” الذي يُعرض على قناة الحياة، قائلة: “في رجال دين على راسي من فوق وخدموا الدين لأخر لحظة في حياتهم وتركوا علم يفيد الأجيال اللي جاية بارك الله فيهم، وفي المقابل في رجال دين كرهونا في الدين، وسودوا الدنيا في وشوشنا، وخلونا شايفين الحياة أضيق من خرم الإبرة”.
واستطردت: “في رجال دين احتكروا الدين لحسابهم، يكفروا ده ويهدروا دم ده ويلعنوا ده، واعتبروا ان معاهم صك الجنة يمنحوه للي عاجبهم، ومعاهم صك النار يتوعدوا بيه اللي مايعجبهمش مع ان رب العزة لم يفوض أحد عشان يتكلم بإسمه، ومفيش واسطة ولا حاجز بين العبد وربه”.
واختتمت “فاخر” قائلة: “ربنا هو اللي بيحاسب كل إنسان على أعماله، والرسول صلى الله عليه وسلم نفسه لم يفرض سيطرته على أحد، ليه بقى بعض رجال الدين اللي الدين برئ منهم نصبوا أنفسهم قضاة وجلادين، ليه بتقفلوا أبواب الرحمة في وشوش الناس، ليه على طول ماسكين في آيات العذاب وجهنم والجحيم، وسايبين أيات الرحمة والمغفرة وجنات النعيم، رحمة الله على الشيخ الشعراوي ، وربنا يسامح أشباه رجال الدين اللي سمموا حياتنا”.