رولين القاسم تكتب: ما لا يطلبه المشاهدون
برامج التلفزيون بقت بتلعب على 3 محاور فقط “الجنس والمخدرات والدين”.. شوف يا سيدي مرة كده في ليلة غاب عنها القمر قلت اسهر واقلب في التلفزيون، لقيت قناة براقه…حراقه…برامجها و مذيعينها حاجه آخر الاجه…الصرف باين في البرامج من أول اختيار المذيع المثير للجدل مرورا ب المذيعه المثيرة للاشمئزاز او الاعجاب (بتوع نشرة الاخبار حاجه آخر حلاوة )وانتهاء بالديكور المبهر المتكلف اوي اوي.
حظي كان عالي….أول برنامج مدته لا تزيد عن 25 دقيقه بس بالإعلانات الصاخبة من سمن لشامبو لمساحيق غسيل يجي بتاع 45 دقيقه….البرنامج عن الشذوذ الجنسي…مافيش معلومه مفيده اتقدمت للمشاهد في البرنامج غير التشهير والتجريح …حاجه كده كأنك ماسك جرنال اصفر بتتفرج على صور المقبوض عليهم في قضية دعارة وعلى عينيهم شريط اسود مع عنوان كبير بالبنط الأحمر لزوم الاثارة…بس عشان الحبكة الدراميه كان لازم الكاميرا تجيب الناس عرايا وكأنهم في يوم الحشر.حلقه رخيصه هو أقل ما يقال عنها.
بعد البرنامج ده جه بقه برنامج عن الرقص …. و ماله الرقص فن راقي وجميل إنما اللي كان مضحكني على المستوى الشخصي أن كل المتسابقات بيرقصوا احسن من عضوة لجنة التحكيم شخصيا…وأخيرا بقه برنامج عن الوجوديه والإلحاد وكلام لا يودي ولا يجيب يمخول عقل المتفرج ومع مذيع شغلته يولعها حريقة وضيوف بتصرخ وتشتم بعض وناقص يقوم يجيبوا بعض من زمارة رقابهم…حسيت اني في مرجيحه…ولفي بينا يا دنيا دوخينا يا دنيا..لا مني اتسليت ولا مني اتثقفت ولا ايه حاجه غير لخبطه على المسا وشقلبة كيان مالهمش أي لازمة.