شريف إكرامي لـ حسام حسن: "اختيار الكلمة جزء من مسؤولية المنصب"
انتقد شريف إكرامي، حارس مرمى بيراميدز السابق، تصريحات حسام حسن، المدير الفني لمنتخب مصر، التي وصف فيها محمد الشناوي، حارس مرمى الأهلي والمنتخب، بأنه كان "منتهيًا"، مؤكدًا أن اختيار الكلمات المناسبة عند الحديث إعلاميًا من ضمن مسؤوليات منصبه.
قال "إكرامي" عبر حسابه الرسمي على منصة "إكس": "مشكلة كابتن حسام حسن إعلاميًا في رأيي مش دايمًا في اللي عايز يقوله، لكن كتير بتكون في الطريقة اللي بيعبر بيها، وده ظهر جدًا في كلامه عن الشناوي".
أضاف: "المشكلة دي مش جديدة، فمش حابب أقف عندها كتير، لكن اللي لفت نظري في التصريح حاجة تانية".
استكمل: "من حق أي مدرب يختار أو يستبعد أي لاعب لأسباب فنية، مهما كان اسمه وتاريخه، لكن وصف لاعب إنه كان منتهي وإنك أنت اللي رجعته، بيحول الكلام من قرار فني لفكرة تانية خالص، فكرة إن المدرب صاحب فضل على اللاعب".
أشار: "طبعا المدرب ممكن يكون ليه دور في رجوع لاعب لمستواه، لكن لو شايف إن استبعاده صح فنيًا استبعده، من غير ما تحتاج تقول أنا اللي رجعته".
اختتم: "ممكن كابتن حسام حسن ما يكونش قصد المعنى ده، بس أحيانًا اختيار الكلمة بيبقى جزء من مسؤولية المنصب".
كان حسام حسن قد قال في مؤتمر صحفي: "(الشناوي) كان منتهي وما بيلعبش خالص مع ناديه، ومن خلال المنتخب والتدريبات معانا مستواه رجع.. هو من اللعيبة اللي بقدرها جدا، وكان ممكن أقول ده مصاب وأريح دماغي، لكن ده اختيار الجهاز الفني".