7 تصريحات لـ ديفيد برتي عن "الممرض رحيم" في "بنج كلي"
آية سليم
لفت الفنان الشاب ديفيد برتي الأنظار بموهبته التمثيلية من خلال تجسيده دور "الممرض رحيم" في مسلسل "بنج كلي"، ورغم شهرته في مجال صناعة المحتوى والدبلجة، فإن الجمهور شعر أنه يشاهده للمرة الأولى، بفضل تلقائيته في الأداء.
حاور "إعلام دوت كوم" ديفيد برتي للحديث عن كواليس ترشيحه للدور وتفاصيل تجربته الأولى في عالم التمثيل، وجاءت أبرز تصريحاته على النحو الآتي:
1. رُشحت للدور من قبل الكاستنج دايركتور مودي شاهين: "كان شاف شغل ليا قبل كده ورشحني لدور (رحيم)، وحابب إني أشكره وأشكر أستاذة نادين خان على الفرصة الجميلة دي وعلى ثقتهم الكبيرة".
2. قمت ببناء تاريخ للشخصية من أجل اتقان التفاصيل: "عرفت من الـ Script نفسه معلومات عن الشخصية زي (منطقته السكنية، وبحثه عن عمل إضافي) وبنيت باقي التفاصيل من عندي: اللكنة، وطريقة الكلام، وده لأني بنيت له تاريخ إنه قضى جزء من نشأته في منطقة ريفية اكتسب منها اللكنة دي.. والشكل كمان وطريقة الهندام وإنه دقنه وشعره غير منظمين، وده لأنه معظم الوقت رايح بين الشغل والمواصلات والباقي للراحة البسيطة، فبالتالي الوقت المتاح ليه للاهتمام بنفسه مش كبير". 
3. مقابلة ممرضين بالمستشفيات أضافت للشخصية..: "وأضافت تفصيلة (القلم اللي في جيبه) دي لأني وقت التحضير للدور اتقابلت مع صديق ليا طبيب وزميله من قسم التمريض وكلموني عن إن التمريض دايما بيكون معاه قلم بيستخدمه طول الوقت وبيحافظ عليه، ومش بيسلفه لحد عشان بيضيع دايما منهم.. هي تفصيلة صغيرة لكنها عجبتني، فضيفتها".
نرشح لك: محمد سليمان عبد المالك: الحالات الطبية في "بنج كلي" حقيقية
4. محمد صلاح كان له دور في بناء الشخصية: "في بعض التفاصيل التانية ماظهرتش على الشاشة وكانت بتساعدني وأنا شغال، منها التليفون بتاعه، وكانت الصورة اللي على شاشته لـ"محمد صلاح"، باعتباره لاعب رحيم المفضل، وحتى الشنطة اللي كان بيخرج بيها من المستشفى كان عليها صورة لاعب كمان".
5. المذاكرة الجيدة والتلقائية كانتا مفتاح أدائي في التصوير: "كنت بذاكر المشهد كويس وأفهم علاقتي بنفسي وبالشخصيات والمكان اللي أنا فيه، وإيه اللي بحاول أعمله في المشهد ده، وبعدها بحفظ النص نفسه كويس من غير ما أحفظ أداء معين، عشان يكون طبيعي أكتر. وبتكلم بلسان "رحيم" بشكل ارتجالي مع نفسي عشان أتعود على طريقة الكلام، ووقت التصوير بحاول أكون حاضر ذهنيًا وأسمع اللي قدامي فعلًا من غير توقعات للي هيحصل في المشهد". نرشح لك: "انتظرت الفرصة كثيرًا والجمهور عرفني من صوتي".. زهرة رامي تكشف كواليس "ميسرة" في "بنج كلي"
6. سعيد للغاية بالإشادات وبالتعاون مع فريق العمل: "الحمد لله ردود الأفعال كويسة ومبسوط إن الناس حبت (رحيم)، وده توفيق كبير من ربنا.. والحمد لله فريق العمل كان جميل، وأستاذة نادين خان نفسها كانت سبب في خلق الجو ده، وشايف إنه أكيد كان له مردود في الكيميا ما بينا كلنا في المشاهد.. في أوقات وإحنا جوا اللوكيشن كنت بحس إننا فعلاً في المستشفى بدور كل واحد فينا، ودي كانت حاجة جميلة جدا".
7. لم أحسم أمر مشاركتي في أعمال فنية مقبلة حتى الآن: "مفيش اتجاه درامي معين ناوي عليه.. لكن لو في دور حلو وفي تجربة وخبرة كويسة ليا وهتعلم منه، أكيد هكون مهتم إني أعمله".