"انتظرت الفرصة كثيرًا والجمهور عرفني من صوتي".. زهرة رامي تكشف كواليس "ميسرة" في "بنج كلي"

لينا رحمو

رغم نجاح زهرة رامي في مجال الإعلام، سواء في التلفزيون أو الراديو، ومشاركتها في عدد من الأعمال الفنية، كان آخرها فيلم "إذما"، إلا أنها استطاعت أن تخطف الأنظار بقوة منذ ظهورها الأول في مسلسل "بنج كلي"، بطولة دياب وسلمى أبو ضيف، والمعروض حاليًا عبر إحدى المنصات الرقمية.

وقدمت خلال العمل شخصية مختلفة تمامًا عن صورتها المعتادة أمام الجمهور، وظهرت دون مكياچ، ما جعل كثيرين يتساءلون عن هوية الممثلة التي تجسد الشخصية، قبل أن يكتشفوا أنها الإعلامية زهرة رامي.

حاور "إعلام دوت كوم" زهرة رامي، للحديث عن كواليس تحضيرها للشخصية، ورد فعلها على إشادات الجمهور، وكواليس تجربتها في مسلسل "بنج كلي"، وجاءت أبرز تصريحاتها على النحو التالي:

1. الترشيح كان من الكاستنج دايركتور مودي شاهين والمخرجة نادين خان: "من أول ما قرأت الدور وأنا بذاكر، وكنت عارفة إن ده أول دور يبيّن قدراتي التمثيلية، لأنه مختلف عني تمامًا وفيه تصاعدات في الشخصية".

2. ردود فعل الجمهور كانت غير متوقعة: "الناس اتفاجئوا بيا، لأن دي أول حاجة أعملها وتبقى بعيدة عني في كل حاجة. وفي ناس عرفتني من صوتي أصلًا، وده كان بالنسبة لي حاجة لذيذة قوي. أنا طبيعية، بس مش بتكلم زي زهرة اللي متعودين يسمعوها في الراديو".

3. كنت أنتظر هذه الفرصة منذ زمن: "مبسوطة قوي إن الفرصة جات ليّ لحد عندي، وكنت مستنية فرصة زي دي تيجي وبذاكر لها طول السنين اللي فاتت. أنا أصلًا ابتديت مسرح بكلية تجارة وكان دفعتي محمد فراج ومحمد شاهين.. وما بطلتش أشتغل على نفسي علشان لما تيجي فرصة زي دي أبقى قدها".

4. لم أنزعج بظهوري بدون مكياج بل كنت سعيدة بذلك: "المخرجة نادين خان ما كانتش عاوزاني أحط مكياج خالص، ولو شعري متظبط كانت بتنعكشه؛ لأنه مش طبيعي إن واحدة حامل في الآخر تبقى قاعدة مهتمة بنفسها بالشكل ده. وكان بيتحط لي مكياج علشان أبان تعبانة.. الناس عارفاني كمذيعة، فكنت حابة يشوفوا حاجة جديدة ومختلفة".

5. زيادة الوزن كانت غير متعمدة وهناك عوامل مساعدة: "أنا دلوقتي أرفع كتير، وقت التصوير كنت أتخن من دلوقتي 10 كيلو، وكنت ناوية أخس، لكن لما جالي الدور أجلت، وكمان كنت لابسة لبس بيتخن ولابسة بطن، ووقت تصوير المسلسل كنت بعمل لقاءات عادي.. أنا لو كنت قاصدة أعمل زيادة وزن للدور مكنش هيحصل كده، أنا بس أجلت الدايت".

6. نجاح أول مشاهدي كان غير متوقعًا: "آخر حاجة كنت أتوقعها نجاح وتصدر مشهد (رغبتي في الطلاق بسبب اسم الطفل) للترند. ومن أول ما قرأت المشهد كنت بضحك من الفكرة وبقول: أكيد مفيش واحدة بتطلق علشان كده. وسألت المخرجة: هو ده كوميدي؟ قالت لي: ده بجد جدًا وهي محروقة ومنهارة، وفهمت بعدها".

7. كنت أعلم أن الجمهور سيشيد بدوري: "كنت متوقعة إن في المسلسل ده بعض الناس هتشوفني ممثلة شاطرة، لأن في تفاصيل كتير وتطورات في الشخصية. وكنت متوقعة الناس تاخد بالها مني بعد عدد من الحلقات، مش من أول مشهد، خاصة إن في أحداث مفاجئة ومتطورة في الحلقات اللي جاية".

8. أحببت "ميسرة" وكنت أتمنى أن يحبها الجمهور: "كنت مركزة في دوري، وكان أهم حاجة عندي إني أحب ميسرة والناس تحبها وتوصل للناس، وأعتقد إنها وصلت للناس. والحمد لله إن الناس شايفاني تلقائية. ومكنتش متوقعة إنه يعمل الصدى ده، بس كنت عارفة إن الدور ده هيبين إني ممثلة، مش مجرد واحدة دمها خفيف وخلاص، لكن يبين إني أقدر أمثل حاجات مختلفة، مش كوميدي بس".

9. دياب متعاون ويتقمص الشخصية بشدة: "ممثل جميل ونجم محترم جدًا. كنت أعرفه، لكن أول ما اشتغلت معاه كنت متاخدة من كتر ما هو متعمق وداخل جوه شخصية عزازي، ومبقتش فاهمة هو ليه قافش في الحقيقة! 😂 لكنه متعاون جدًا، والكيميا بيني وبين دياب ولبنى ونس كانت واضحة، بفضل المخرجة".

10. لا يوجد أي أوجه تشابه بين شخصيتي الحقيقية وميسرة: "مفيش تشابه إطلاقًا، وهي مش قاصدة تبقى دمها خفيف لكن أعصابها تعبانة، وهي كتومة جدًا وأنا مش كتومة خالص. ولسه ما حملتش علشان أبقى عارفة هعمل إيه في الحمل، وأنا معملش اللي هي عملته، ولا أسكت زي ما هي بتسكت. حتى طبقتها الاجتماعية مختلفة، وهي أخت أصغر وأنا أخت أكبر".

11. انتظروا مفاجآت الحلقات المقبلة: "الحلقات اللي جاية فيها مفاجآت كتير، ومش عاوزة أحرق الأحداث، بس أنا ضحكتكم خلاص، الفترة اللي جاية هنشف ريقكم!".

12. الإعلام أصعب كثيرًا من التمثيل: "أنا كمذيعة مسؤولة عن كل كلمة بقولها، وبنتكلم عن أحداث حقيقية، وبكون حذرة في كل كلمة. لكن في التمثيل أنا بمثل أصلًا واحدة تانية، مش أنا ولا أفكاري. وأنا أصلًا بدأت المسرح الأول، وبعدين اشتغلت مذيعة".