لطفى لبيب يروي كواليس مشاركته بحرب أكتوبر

عبر الفنان لطفى لبيب عن فخره الكبير بمشاركته بحرب أكتوبر العظيمة وسعادته بالانتصار، موضحا كواليس الأحداث.

قال "لبيب" خلال لقائه الخاص بحرب أكتوبر عبر قناة "الحياة": "أنا كنت في الكتيبة 26 مُشاه تبع اللواء التامن الفرقة السابعة، مهمتنا كانت نعبر قناة السويس ونستولى على النقط الحصينة اللي في الضفة التانية اللي جوا سينا".

تحدث عن تجهيزات الحرب ويوم ما قبل الحرب، قائلا: "5 أكتوبر ابتدى بالليل قالك شادة جامدة وزير الدفاع هيعدي وبعد كده تفتح الإجازات، مكناش فاهمين إن دي حرب لغاية لما جه 6 أكتوبر فجأة لاقينا الله! ده بجد!".

تابع "لبيب": "التبة الترابية بتاعتنا قعدوا الناس ينشروا غسيلهم وقاعدين بملابسهم الداخلية وفارشين الغسيل على البطاطين واحنا بنستعد ورا بننفخ قوارب، قبل ما نعبر حصل تمهيدات المدفعية، من كتر تواصلها تحولت إلى هدير متصل على أثره خرجت الفيران من الأرض وبدءت تجري مذعورة".

وعن لحظة العبور، تابع قائلاً: "عبرنا عند محطة جنيفة العسكرية، كان قدامنا نقطتين قويتين، المسحورة والقوية.. اللي ماسك السرية التانية في الكتيبة اسمه سيد البرعي، إدى أوامر كل الناس تنزل في حفر برميلية، وابتدت تضرب المدفعية واقتحم النقطة القوية وخدنا كل اللي فيها أسرى معانا".

أشار لكيفية مواجهة بعض الصعوبات مثل الحرمان من المياه، موضحا: "بعد كده حصلت الثغرة، كام حصار هش حاولوا يضايقونا فيه، يعني لما حرمونا من المياه كنا بناخد زمزمية مياه في اليوم، تلبى جميع احتياجاتك بيها، فكنا نخلع خزانات البنزين من العربيات المضروبة ونولع تحتيها الكاوتش بتاع العربية ونقطر مياه، وعدينا أزمة المياه وقطرنا المياه وماعطشناش".