كيف سببت رموش سعاد حسني أزمة بفيلم "الزوجة الثانية"؟

نورهان محمد 

قال الماكيير محمد عشوب، إنه عمل كمساعد ماكيير، ثم أصبح ماكييرا للفنانة سعاد حسني في العديد من أفلامها، مثل فيلم “صغيرة على الحب”، وفيلم “الزوجة الثانية”، وغيرهم.

أضاف “عشوب” خلال استضافته في حلقة مساء أمس، مع الإعلامية إيمان الحصري، في برنامج “مساء dmc”، المذاع عبر شاشة “dmc“: “في أفلام سعاد حسني أنا كنت مساعد ماكيير أول مش ماكيير، بس كنت أنا اللي بعمل المكياج، كنت مساعد ماكيير موهوب أوي، وكنت بشتغل مساعدة مع ماكييرات أساتذتي الكبار، فالماكيير مبيعقدش وبيمشي، فكان ساعات الماكيير ممكن يعمل مكياج، وبعد ما بيمشي ألاقيها شالته وقالتلي تعالى يا محمد، فكنت ببقى موجود كماكيير منفذ للعمل، إنما معظم الأعمال دي كلها كنت أنا اللي بعملها”.

نرشح لك: منى زكي تتحدث عن تجسيد شخصية سعاد حسني

تابع: “سعاد حسني أجمل وش برئ على الشاشة المصرية، سعاد حسني تستحق لقب سيدة الشاشة العربية مع احترامي طبعا للسيدة العظيمة فاتن حمامة، هناك اثنين لا يقارنوا لأنهم عملوا كل الأدوار وبجدارة وهم سعاد حسني وشادية مع احترامي لكل الموجودين”.

أشار: “أنا سبب حكاية الرموش بتاعتها دي، كنت بشتغل مع ماكييرات من إيطاليا أيام ما كان بييجي هنا أفلام إيطالية أو أمريكية بتتصور، فعملت مع الماكيير الخاص بتاع صوفيا لورنس، كان بيصنع الرموش ووراني إزاي بتتعمل، وأنا كنت بصنع الباروكات، والشنبات، فابتديت أصنع الرموش، فجتلي سعاد كنا بنعمل فيلم (شئ من العذاب) هي وأستاذ يحيى شاهين, وحبيبي وأخويا حسن يوسف، فكان هذا الفيلم أول فيلم تركب فيه رموش”.

روى “عشوب” موقف طريف للفنانة فاتن حمامة والمخرج صلاح أبو سيف من فيلم “الزوجة الثانية”، قائلا: “أول يوم تصوير عملتلها رموش خفيفة أوي، وأستاذ صلاح أبو سيف حط الكاميرا وبيبص في وشها، فنادى يا مكياج قولتله أيوة يا أستاذ قالي إيه اللي في عين سعاد ده، قولتله دي رموش، راح باصصلي وقالي مرات أبو العلا تحط رموش اللي بتغسل حلتها في الطين دي تحط رموش، فسعاد قالتله أستاذ صلاح دول خفاف قالها نو كومنت، قولتلها بقولك إيه ده أول يوم تصوير ليا وليكي هيمشونا أنا وأنتي شيلي”.