انتصار: مفيش حاجة اسمها كل الرجالة خاينين دي عقد نفسية!

انتقدت الفنانة بدرية طلبة البرامج النسائية التي تحرض المرأة ضد الرجل، والرجل ضد المرأة. مؤكدة أنها ستكون محايدة ولن تحرض أي طرف ضد الآخر.

قالت “طلبة” في مقدمة برنامجها “من غير نفسنة” الذي تقدمه مع الفنانة انتصار ونوليا، عبر شاشة قناة “هي”: “في برامج بتنصف المرأة ضد الراجل وبرامج بتنصف الرجل بطريقة أوفر ضد المرأة، وأنا هنا في النص اتلغبطت وأنا أتأثرت لدرجة أن صوتي بقى شتوي، أنا عايزة أبقى محايدة لا مع ده ولا ده”.

نرشح لك: يسري نصر الله: السينما دخلت في أزمة بعد التخلي عن المغني والراقصة

وعلقت الفنانة انتصار، قائلة: “مفيش حاجة اسمها كل الرجالة خاينين ووحشين، ليه ما الراجل ده أبوكي وأخوكي وابنك اللي مخلفاه من بطنك، وابن عمك اللي بيخاف عليكي وبيرعاكي، كل دول وحشين؟ ولا أنتي مركزة بس في العلاقة العاطفية مع الزوج والحبيب؟ الرجالة اختزلتيهم في دول؟ في حاجة اسمها بعض ونسبة، وناخد كل نسبة بحالتها وتربيتها”.

تابعت انتصار: “في تسخين وتقوية شوكة ويتقال متسكتيش وعقد نفسية، وتحس داخلة الموضوع متحفزة بدل ما يكون في صفاء نفس، ومتطخيش ومترضعيش ومتديلوش فلوس من بتاعك، هو أنا عايشة مع عدوي؟ ما تدبحيه وتخلصي.. البنت يبقى فيها العبر، وبتقول ده جري ورايا هو كان يطول؟، يطول إيه ده الشرع محلل له 4، هو إيه علشان يطول ضفرك”.

من جانبها، قالت نوليا: “وارد اختلاف الآراء، ولكن مينفعش حد يفرض رأيه على المرأة، رأيي نبقى بين البينين ولا تبلكيه (بلوك بلوك بلوك)، ولا تفرعنيه (الفرعون الصغير)، لأن أنا كنت من الستات اللي كنت بجيب المياه وأحط فيها الملح، وفي راجل بيتمرع لما بيلاقي الست بيعمل كده”.

‎
كما حرصت الفنانة بدرية طلبة على توجيه النصائح للسيدات، بأن يعاملن أزواجهن بلين، وأن يعملان سويًا على تسوية الأمور المعيشية. وقالت: “مرتبك على مرتبي ونمشي الدنيا، هما الاتنين واحد، وأكبر دليل على ده إني معمرة في جوازي، لأني ماشية على المبدأ ده”.

بينما قالت انتصار: “بتجيبوا ناس تصلح ما بينكم وبتهجرها في الفراش وترجع ليها، وفي حاجات كتير كل ده عشان نصلح العلاقة، نقوم نعمل برامج تبوظ العلاقات؟ والدولة أساسًا بتبذل جهد وفلوس علشان تحافظ على الأسرة لأن نسب الطلاق في ارتفاع، وإحنا دلوقتي في 2023 بدأت تقل، نقوم إحنا ماشيين نعمل برامج تمشي عكس الدولة، والمؤكد أن نوعية البرامج المستفزة اللي ضد الطبيعة دي بتقوي النوع ده”.

وعلقت بدرية طلبة على حديث انتصار قائلة: “نسبة الطلاق بتقل علشان نسب القتل بتزيد”.

“من غير نفسنة” برنامج نسائي ساخر يقدمه كلا من الفنانة انتصار وبدرية طلبة ونوليا، يعرض يوميًا من السبت إلى الثلاثاء، ويقدم عددًا من القضايا الاجتماعية بطريقته الساخرة والخاصة من خلال استضافة عددًا من الشخصيات المؤثرة على السوشيال ميديا والمشاهير والفنانين لمعرفة آرائهم في تلك القضايا.