بسبب خريجي "آداب مسرح".. محمد علي رزق ينتقد " ليه لأ 3"
انتقد الفنان محمد علي رزق مسلسل “ليه لأ” الجزء الثالث، وذلك بسبب مشهد في الحلقة الثامنة تضمن إشارة خلال الحديث إلى تعليم التمثيل في أقسام “آداب مسرح”، والذي اعتبره انتقاصا من خريجي آداب مسرح بسبب الحوار الذي تضمنه المشهد.
كتب عبر حسابه على موقع التواصل الاجتماعي “فيس بوك“: “بتفرج على مسلسل (ليه لأ) الجزء التالت.. منكرش حبي الشديد لمسلسل ليه لأ من الجزء الأول علشان بيناقشوا قضايا مهمة وبشكل مختلف وفي كل مرة قدروا يلمسوا الناس، وفي الجزء الأخير بيناقشوا قضية مهمة جداً ومنتشرة بنسبة كبيرة أوي في مجتمعنا الشرقي”.
نرشح لك: نيللي كريم تكشف تفاصيل دورها في “ليه لأ 3”
تابع: “بس شوفت مشهد عزومة في حلقة 8 وفجأه في آخر المشهد اتنين ممثلات لطاف جداً:
ياسمين: وحضرتك بتدرسي فين؟
منه: لا أنا بدرس في آداب مسرح
ياسمين: بجد
منه: أوعى تقولي عاوزه تمثلي
ياسمين: لا صاحبتي ندي بتحب تغني وتمثل ونفسها تتعلم تمثيل
(تقوم أستاذة منه إللي بتدرس في آداب مسرح تقولها إييييه)”
منه: هو إحنا مش بنعلم تمثيل أوي يعني.. أكاديمية الفنون هي بتاعت التمثيل إللي بجد
أضاف: “نعم؟! ده بجد؟! طبعا أكاديمية الفنون البيت الكبير والصرح إللي طول عمره مليان أساتذة كبار وطلع أجيال كتير مهمة.. تصحيح للأساتذة إللي كتبوا المسلسل لا يا فندم قسم آداب مسرح بيعلم تمثيل بجد.. وفيه نجوم خريجين قسم آداب مسرح زي فتحي عبد الوهاب وسامح حسين وأحمد فتحي وياسر الطوبجي، وغيرهم كتير أوي وفيه دكاترة محترمة بتعلم التمثيل إللي بجد، وأنا بتشرف إني خريج كلية الآداب قسم علوم المسرح”.
اختتم: “كنت أتمنى مناقشة المشاكل إللي بتقابلها أقسام المسرح في أغلب الجامعات، زي النظر لينا نظرة إيه الهبل ده وإن كل أقسام كلية الآداب شايفين إننا عيال هايفة علشان بندرس فن، ويقعدوا يتريقوا لعدم فهمهم قيمة الفن إللي كنا بندرسه”.
يناقش “ليه لأ 3” عدة قضايا تخص المرأة، ويتناول المشكلات التي يواجهنها المطلقات في المجتمع المصري والعربي، وما تعاني منه في تلك المرحلة وما بعدها فيما يخص رغبتها في الزواج ورفض الأبناء لذلك.
وتجسد نيللي كريم خلال أحداث العمل شخصية سيدة مطلقة ولديها ابن لا يتقبل زواجها من شخص آخر ما يتسبب لها في أزمة حياتية.
“ليه لأ 3” من بطولة نيللي كريم، وعايدة رياض، وصلاح عبد الله، ومعتز هشام، وأحمد طارق، وإخراج نادين خان، تأليف سرد، إشراف على الكتابة مريم نعوم، فكرة سارة الطوبجي، سيناريو وحوار سارة الطوبجي، سلمى عبدالوهاب، بولا ثابت، إيمان صالح.