أحمد وفيق: أهلي كانوا رافضين عملي في التمثيل

مريم عبد الحافظ                        أحمد وفيق

تحدث الفنان أحمد وفيق عن رفض وخوف عائلته من دراسته للتمثيل، وأنه قرر دخول كلية التجارة بسبب شهرة وقوة فريقها المسرحي في ذلك الحين.

قال “وفيق” خلال لقائه في برنامج “بالخط العريض” المُذاع عبر شاشة “الحياة”: أعتبر الخط العريض في حياتي هو أول مُعلم درس لي في المرحلة الابتدائية، فهو من جعلني التحق بفرقة التمثيل، ولكن لا يوجد شخص في عائلتي مهتمًا بالفن.

نرشح لك: أحمد وفيق: خالد النبوي من أهم ممثلي الوطن العربي

تابع: كان والدي مُهتمًا بالشباب لأنه في ذلك الوقت كان أمين الشباب في محافظة المنصورة، وأسس نادي السينما في قصور الثقافة، ولكن ذلك كمنطق ثقافي وتوعوي، موضحًا: “هما كانوا شايفني موهوب في الرسم والتمثيل بس ماكنوش شايفنها شغلانة، وإن التمثيل ما ينفعش شغلانة”.

أكمل: “أنا كنت بقول إني عايز أمثل من قبل ما أدخل أولى ابتدائي، لأن أنا كانت شغلتي في البيت إني قاعد بقلدهم، وأي شخصية واضحة قدامي بلقطها وبقلدها، ومعرفش إيه اللي شدني للتمثيل وأنا صغير، بس لما كبرت بتخيل إن ربنا بيسبب أسبابه لكل الناس، واللي عنده موهبة بينبهه بشكل قدري جدًا”.

أضاف: “أنا لقيت نفسي بعمل ده ومعرفش دي خفة دم ولا غلاسة مني، لكن اللي حواليا كانوا بيضحكوا ومعتبرنها خفة دم، وزمايلي في ابتدائي اللي بيتفرجوا دلوقتي هيفتكروا كلامي ده، أنا كنت ما بين الحصص بطلع أعمل عرض، وكنت غاوي أمثل المسلسلات التاريخية، فكنت أتخن صوتي وأعمل الراجل، وارفعه عشان أعمل الست، فكبرت في دماغي بقى لما بلاقي صحابي فرحانين ومبسوطين ويقولولي يلا يا أحمد اطلع مثلنا شوية”.

تابع: سافرت خارج مصر وكان هذا الوقت هو بداية تكوين الفرق المسرحية في المدارس، فالتحقت بها وأنا في الصف الثالث الابتدائي، وعندما عُدتُ إلى مصر لم أجد نشاطًا مسرحيًا في المدرسة أو في المنطقة، لأنها كانت موجودة فقط في المدارس النموذجية، وكانت عائلتي مُعترضة ومتخوفة من دراستي للتمثيل بعد الثانوية العامة.

أكمل: “قولت اخد شهادة الأول وبعد كده أكمل، وأنا كنت فاكرهم ضدي لكن بعد كده عرفت إن ده خوف، بدليل إنهم فرحوا لما بقيت ناجح، واختارت كلية تجارة لأنها كانت أهم كلية في الجامعة عندها فرثة تمثيل، وأنا في أي حاجة فيها حساب أو كيميا ببقى مهنج، فالطبيعي إني لا يُمكن أدخل كلية كده بس دخلتها، ولو أنا مُمثل كويس فأعتقد إن جزء كبير من الفضل يرجع لفرقة تمثيل الجامعة”.

يُذكر أن، أخر أعمال الفنان أحمد وفيق هي مسلسل “جميلة”، الذي شارك في السباق الرمضاني 2023، بطولة ريهام حجاج، سوسن بدر، يسرا اللوزي، عبير صبري، وهاني عادل، ومن إخراج سامح عبد العزيز.