أشرف زكي: الوسط الفني زي أي مهنة فيه تنازلات

أشرف زكي
قال الفنان أشرف زكي، إن سبب انفصاله لفترة عن زوجته الفنانة روجينا، هو أنها طلبت منه هدنة، موضحا أن هذه الهدنة لم تزيد عن شهرين أو ثلاثة وسرعان ما عادا إلى بعضهما مرة أخرى.

أضاف “زكي” خلال لقائه في برنامج “VIP” وتقدمه الإعلامية أميرة بدر، على قناة “هي”: “لما سبنا بعض أنا وروجينا مكنتش مصدق، ومضايق ومتألم جدا، ومكنتش متزن وحاسس بوحدة وأن روحي مش معايا، وخاصة عشان كان عندنا بنت وده كان فارق معايا جدا وكنت حاسس أنها محتاجة هدنة.. وعملنا هدنة ومقعدتش شهور يعني والحمد لله رجعنا”.

أما عن شائعات طلب روجينا الطلاق منه بسبب أنها رأته مع امرأة في كافيه، أوضح: “أقسم بالله ما حصل، روجينا مش تافهة للدرجة دي وأنا بقعد مع مليون واحدة، ومفيش ست مابتغيرش، وأنا بغير عليها جدا، ولكن مستوعب ملاقيهاش قاعدة مع زميل وأغير عليها”.

أشار إلى أن الحالة الصحية للفنانة عبلة كامل جيدة، قائلا: “الفنانة الكبيرة العظيمة عبلة كامل زي الفل، وأنا بتواصل معاها دائما وبنتكلم أوقات طويلة جدا وبنضحك وبنهزر، وهي تاريخ عظيم، وخدت قرار أنها تبتعد.. هي من زمان عندها قناعات، وبتختار أدوار معينة”.

تابع: “تواصلنا مع عبلة كامل أيام مهرجان الدراما أنا ودكتور يحيى الفخراني عشان كنا عايزين نكرمها بس هي ماكنتش حابة وضغطنا عليها جامد جدا، بس ماكنتش حابة”.

أما عن وجود تنازلات في الوسط الفني أشار: “أي وسط وأي مهنة فيها تنازلات.. وأي ممثلة تتعرض للتحرش تقدم شكوى هيتحقق فيها وحقها هيجيلها مفيش حد فوق القانون، لو أدين هيتعاقب”.