منة فضالي: كنت بعوض غياب بابا بالارتباط برجالة أكبر سناً
قالت الفنانة منة فضالي، إنها اضطرت للارتباط من رجال أكبر منها سنًا بسبب ترك والدها لها، وهي في مرحلة الطفولة.
وتابعت “فضالي” خلال لقائها مع الإعلامية أميرة بدر ببرنامج “VIP” على قناة “هي”: بابا موجود ومش موجود، وكنت شايفة طول الوقت أنه مش موجود بارادته، بزعل، اتعودت أبقى قوية وأني معتمدتش على حد، وكنت بدور على الارتباط أني ارتبط بناس أكبر مني سنًا، وكنت بدور على الأب في علاقاتي، وكنت مرتبطة بناس أكبر مني بـ 30 سنة، وبطلت دلوقت أدور عليه، عندي عماتي بيسألوا عليا وأعمامي بيكلموني طول الوقت ولكن مبنتقابلش باستمرار، وعندي عمة مفضلة بحبها، وعندي أخوات مسافرين برا مصر، وأخوات معرفش عنهم حاجة.
نرشح لك: منة فضالي: والدي سابني وأنا عندي شهرين ونفسي أعرف ليه؟
واستكملت منة فضالي حديثها: أنا كبرت واتعودت أكون لوحدي، بعد ما كبرت حسيت أني مش خسرانة، أمي تعبت وشقيت عشان تكبرني، وكنت بشوف ده، عندي صحابي بيتطلقوا قريب وقولتلهم متطلقوش عشان الأطفال هتدفع تمن ده محدش هيدفع التمن غيرهم، وهو مش حاسس أنه بيخسر ولاده وهيفتقد يشوفهم وهما بيكبروا، أي حد بيخسر ولاده في الوقت ده عمره ما هيرفع يرجعهم تاني.
وأضافت: شفت والدي لأول مرة وأنا عندي 21، وجالي عريس وقعد معاه وكان العريس عايش في أوروبا، وقالهم خدوها ومش عايز منكم أي حاجة واحنا بنشتري راجل، وقال لأمي هما بيحبوا بعض وخلينا نخلص، ولما العريس حكالي قولتله مستحيل بابا يعمل كدا، قالي لأ قالي كدا، مستحيل أب يعمل كدا
وقالت: لما بتفرج على فيلم أو مسلسل وبشوف مشاهد عن الأب بعيط، وأنا شخصية حساسة وكل حاجة بتأثر فيا، ومبحسش أني عايزة أكلمه، هو ميعرفش عني حاجة دا بابا ناسي عيد ميلادي، عمري ما حسيت أنه عنده مشاعر تجاههي.
الجدير بالذكر أن برنامج «vip» يعرض على شاشة «هي» يوميًا في شهر رمضان في تمام الساعة 11 مساءً، كما يعاد عرضه في اليوم الثاني في تمام الساعة 3 صباحًا، والساعة 10 صباحًا